२०८३ श्रावण २८ गते बिहिवार
२०८३ श्रावण २८ गते बिहिवार
.gif)
पत्रकार किशोर श्रेष्ठको विनाशर्त रिहाइको माग गर्दै नेपाल पत्रकार महासंघले काठमाडौं प्रहरी परिसर अगाडि धर्ना दिएको छ ।
महासंघका अध्यक्ष निर्मला शर्माको नेतृत्वमा पुगेका पत्रकारहरुले प्रेस स्वतन्त्रताको पक्षमा प्रदर्शन गर्दै श्रेष्ठलाई तत्काल रिहा गर्न माग गरेका हुन् । धर्नाका क्रममा प्रहरी र पत्रकारबीच केहीबेर घम्साघम्सीसमेत भएको थियो ।
शान्तिपूर्ण धर्नामा बस्न खोज्दा प्रहरीले रोकेको भन्दै पत्रकारहरुले आक्रोश व्यक्त गरेका थिए । उनीहरुले ‘प्रहरी दमन मुर्दावाद’, ‘राज्य आतंक बन्द गर’, ‘प्रेस स्वतन्त्रता पुनर्बहाली गर’ लगायतका नारा लगाएका थिए ।
कालोपट्टी बाँधेर प्रदर्शनमा सहभागी पत्रकारहरुले प्रेस स्वतन्त्रतामाथि हस्तक्षेप भएको आरोप लगाउँदै विरोध जनाएका छन् । उनीहरुले ‘पत्रकार किशोर श्रेष्ठलाई विनाशर्त रिहा गर’ र ‘पत्रकार तर्साएर प्रेसको मुख थुन्ने प्रयास असम्भव’ लेखिएका प्लेकार्ड प्रदर्शन गरेका थिए ।
यसअघि प्रहरीले जनआस्था साप्ताहिकका प्रधानसम्पादक किशोर श्रेष्ठलाई पक्राउ गरेको थियो । प्रहरीले श्रेष्ठमाथि वैयक्तिक गोपनीयतासम्बन्धी ऐन, २०७५ विपरीतको कसुर गरेको आरोपमा अनुसन्धान भइरहेको जनाएको छ ।
प्रहरी टोलीले जनआस्थाको कार्यालयमा खानतलासीसमेत गरेको भन्दै पत्रकार महासंघले आपत्ति जनाएको छ । महासंघले श्रेष्ठलाई तत्काल रिहा नगरे कडा आन्दोलन गर्ने चेतावनी दिएको छ ।
श्रेष्ठ विश्व प्रेस काउन्सिलका वरिष्ठ उपाध्यक्ष, प्रेस काउन्सिल नेपालका पूर्वअध्यक्ष तथा नेपाल पत्रकार महासंघका पूर्वमहासचिवसमेत हुन् । खोजी पत्रकारितामा आफ्नो छुट्टै पहिचान बनाएका श्रेष्ठ निर्भिक पत्रकारका रूपमा परिचित छन् ।
© 2026 All right reserved to khabarcnter.com | Site By : Sobij
