२०८२ फाल्गुण २४ गते आइतवार
२०८२ फाल्गुण २४ गते आइतवार
काठमाडौं । पूर्वराज्यमन्त्री तथा नेकपा माओवादी केन्द्रका पूर्वपोलिटब्यूरो सदस्य श्रीप्रसाद जबेगु नेकपा एमाले प्रवेश गरेका छन् । सर्वोच्च अदालतले नेकपा एमाले र नेकपा माओवादी केन्द्र ब्युँताएपछि एमाले प्रवेश गरेका जबेगु संविधानसभा सदस्य समेत हुन ।
उनी दोस्रो संविधानसभामा माओवादीबाट समानुपातिक सभासद थिए । जबेगु २०७३ सालमा प्रचण्डको नेतृत्वमा गठन भएको सरकारमा संघीय मामिला तथा स्थानीय विकास राज्यमन्त्री र पशुपंक्षि बिकास राज्यमन्त्री थिए ।
नेकपा एमाले र नेकपा माओवादी केन्द्रबीच एकता हुनु अगाडि नेकपा माओवादी केन्द्रको पोलिटब्यूरो सदस्य रहेका जबेगु पार्टी एकतापछि जिम्मेवारी विहीन थिए । एकताको क्रममा कुनै पनि जिम्मेवारी नदिइएपछि असन्तुष्ट रहेका जबेगुले भने– ‘पार्टी एकतापछिको यो समयसम्म कुनै पनि जिम्मेवारी दिइएन । पार्टी नेतृत्वले यो कारण कारवाही गरियो पनि भनेन त्यसैले पार्टी परित्यग गरे ।’
पार्टीले पहिले नेकपा एमालेलाई जुन दृष्टिकोणबाट हेर्ने गरेको थियो त्यो पार्टी एकताको क्रममा सकियो, त्यसैले एमाले र माओवादी जता रहेर पनि जनताको काम गर्न सकिन्छ भन्ने मेरो बुझाइ हो, उनले भने ।
जबेगुले माओवादी केन्द्र निकट लिम्बुवान मुक्ति मोर्चाको अध्यक्षको रुपमा तीन कार्यकाल नेतृत्व गरेका थिए । एमाले प्रवेश गरेका जबेगुको जिम्मेवारीबारे एमालेले निर्णय गरिसकेको छैन । उता ताप्लेजुङ्गका चर्चित माओवादी नेता टंक आङ्गबुहाङ्ग पनि एमाले प्रवेश गरिसकेका छन्। उनी प्रदेश १ को माओवादी संसदीय दलका नेता समेत थिए।
© 2026 All right reserved to khabarcnter.com | Site By : Sobij
