२०८२ माघ ७ गते बुधवार
२०८२ माघ ७ गते बुधवार
काठमाडौं । वैदेशिक रोजगारीमा जाने नेपाली श्रमिकमाथि स्वास्थ्य परीक्षण र अभिमुखीकरण तालिमको नाममा मनपरी शुल्क वृद्धि गरिएको भन्दै नेपाल वैदेशिक रोजगार युवा व्यवसायी संघले सरकारसँग तत्काल निर्णय फिर्ता लिन कडा आग्रह गरेको छ ।
संघले श्रमिकको हितविरुद्ध गरिएका हरेक कदमको विरोध गर्दै, शुल्क वृद्धिले आर्थिक रूपले कमजोर पृष्ठभूमिबाट विदेशिन बाध्य हजारौँ युवामाथि असह्य बोझ थपिने बताएको छ । संघका अध्यक्ष सुमन राज पाण्डेद्वारा जारी विज्ञप्तिमा वैदेशिक रोजगार व्यवसाय व्यवस्थापन सम्मानजनक र पारदर्शी बनाउनुपर्नेमा पछिल्लो समय श्रम मन्त्रालय, स्वास्थ्य संस्था, सेवा प्रदायक र सम्बन्धित निकायहरूले समन्वयविनै नियम विपरीत निर्णय लिनु अत्यन्त आपत्तिजनक भएको उल्लेख छ ।
संघले स्वास्थ्य परीक्षण, तालिम तथा अन्य सेवा शुल्क निर्धारणजस्ता संवेदनशील विषयमा सबै सरोकारवालाबीच सहमति बिना गरिएको कुनै पनि निर्णय स्वीकार्य नहुने स्पष्ट गरेको छ । विज्ञप्तिमा हाल लागू गरिएको स्वास्थ्य परीक्षण मापदण्डका नाममा ३४ प्रकारका परीक्षण थपेर शुल्क दोब्बर पारिएको भन्दै यो प्रक्रिया नै श्रमिक शोषणतर्फ उन्मुख रहेको आरोप लगाइएको छ । संघका अनुसार यद्यपि स्वास्थ्य सेवा गुणस्तरीय हुनु आवश्यक छ, तर वास्तविक परीक्षण लागतभन्दा धेरै गुणा बढी शुल्क तोक्नु अव्यवहारिक तथा अन्यायपूर्ण छ ।
संघले वैदेशिक रोजगारका लागि तयारी गरिरहेका युवाहरूलाई थप आर्थिक बोझ नथोपर्न, सेवा तथा शुल्क प्रणालीमा पारदर्शिता कायम गर्न, शुल्क पुनर्मूल्यांकन प्रक्रिया तात्कालै सुरु गर्न र श्रमिकमैत्री नीति बनाउन सरकारलाई आग्रह गरेको छ ।
संघले चेतावनी दिंदै भनेको छ— स्वास्थ्य परीक्षण तथा तालिम शुल्क वृद्धि निर्णय तत्काल फिर्ता नभए संघले चरणबद्ध आन्दोलनका कार्यक्रम सार्वजनिक गर्न बाध्य हुनेछ । नेपाल वैदेशिक रोजगार युवा व्यवसायी संघले वैदेशिक रोजगार क्षेत्रलाई सुरक्षित, पारदर्शी र युवामैत्री बनाउने आफ्नो स्थायी प्रतिबद्धता दोहो¥याउँदै श्रमिकको हक–हित र सेवा प्रणालीको गुणस्तरीयता सुनिश्चित गर्न निरन्तर सचेष्ट रहने प्रतिवद्धता व्यक्त गरेको छ । संघको महासचिव कृष्ण ढकालले कुनै पनि हालतमा मुल्यबृद्दि हुन नदिने जनाउदै कामदारको रगत पसिना चुस्ने काम गर्न नदिने बताए ।
© 2026 All right reserved to khabarcnter.com | Site By : Sobij
