२०८२ भाद्र ३ गते मंगलवार
२०८२ भाद्र ३ गते मंगलवार
चितवन बाट निर्वाचित सांसद रवि लामिछानेलाई प्रारम्भिक बालविकास सहजकर्ता (इसीडी) शिक्षकहरूले आफ्ना माग पूरा गराउन समन्वय गरिदिन आग्रह गर्दै ज्ञापनपत्र बुझाएका छन् । प्रारम्भिक बालविकास शिक्षक जिल्ला समिति चितवनले सांसद लामिछानेलाई ७ बुँदे ज्ञापनपत्र बुझाएको हो ।
इसीडी शिक्षकहरूले लामो समयदेखि न्यूनतलब तथा सेवासुविधामा काम गर्नु परेको उल्लेख गर्दै उनीहरूले अन्य राष्ट्र सेवक कर्मचारीको सरह सेवासुविधाको व्यवस्थाका लागि पहल गरिदिन लामिछानेलाई आग्रह गरे ।
यसैगरी इसीडी शिक्षकहरूलाई स्थानीय तहबाट पूर्ण रूपमा संघीय सरकारले हेर्ने व्यवस्था गर्न उनीहरूको माग छ । यस्तै एक पटकको लागि उमेरहद नलाग्ने गरी आन्तरिकबाट स्थायी प्रक्रियामा लैजान पनि उनीहरूले माग गरेका छन् ।
अवकास पाउँदा उपदानको व्यवस्था गर्न, सबै सामुदायिक विद्यालयका बालविकास केन्द्रहरूलाई आधुनिक प्रविधिसहित स्रोतसाधनले सम्पन्न गर्न, सबै शिक्षकले पाउने बिदा सरह प्रारम्भिक बालविकास केन्द्रमा कार्यरत शिक्षको बिदाको सुनिश्चितता गर्न माग गरिएको छ । यस्तै दुर्घटना र स्वास्थ्य बिमा लगाएतको व्यवस्था गर्न उनीहरूले माग गरेका छन् ।
ज्ञापनपत्र बुझ्दै सांसद लामिछानेले माग पूरा गराउन आफूले उचित भूमिका खेल्ने बताए ।
© 2025 All right reserved to khabarcnter.com | Site By : Sobij
