२०८२ मंसिर १४ गते आइतवार
२०८२ मंसिर १४ गते आइतवार
मर्जर तथा एक्विजिसनमा जाने सूचीकृत संस्थाहरूले प्रारम्भिक सम्झौता भएको ६ महिनाभित्र उक्त कार्य पूरा गर्नुपर्ने भएको छ । तोकिएको समयमा मर्जर तथा एक्विजिसन प्रक्रिया पूरा नभए पुँजी बजारको नियामक निकाय धितोपत्र बोर्डले कारबाही गर्ने भएको छ ।
नेपाल धितोपत्र बोर्डले बिहीबारदेखि लागू गरेको ‘धितोपत्र दर्ता गराएका संगठित संस्था एक आपसमा गाभ्ने/गाभिने तथा प्राप्ति सम्बन्धी निर्देशिका २०७९’ मा उक्त व्यवस्था उल्लेख छ । निर्देशिकामा ६ महिनाभित्र प्रक्रिया पूरा नगरे संस्थाका सञ्चालक समिति जवाफदेही हुने व्यवस्था छ ।
हालसम्म अपवाद बाहेक सबै मर्जर पूरा हुनका लागि ६ महिनाभन्दा बढी समयावधि लाग्दै आएको छ । बोर्डले गरेको नयाँ व्यवस्थामा ६ महिना समयसीमा तोकिएको हो । यस्तै, मर्जर तथा एक्विजिसन प्रक्रिया सुरु गर्नुअघि धितोपत्र बोर्डको स्वीकृति लिनुपर्ने व्यवस्था पनि निर्देशिकामा छ ।
मर्जर तथा एक्विजिसनमा जाने सूचीकृत संस्थाहरूको सेयर कारोबार अब १५ दिन मात्र रोक्का हुने भएको छ । निर्देशिकामा गाभ्ने संस्था वा प्राप्ति गर्ने संस्था र गाभिने संस्था वा लक्षित संस्थाको सेयर मिलान, धितोपत्र पुन: दर्ता, धितोपत्रको अभौतिकीकरण तथा सूचीकरण लगायत कार्यका लागि बढीमा १५ कार्य दिन सेयर कारोबार रोक्का राख्नुपर्ने व्यवस्था गरिएको छ ।
‘संगठित संस्थाको नाम परिवर्तन नहुने भएमा अर्को संस्थालाई प्राप्ति गर्ने संस्थाको भने सेयर कारोबार रोक्का राख्नुपर्ने छैन,’ निर्देशिकामा भनिएको छ । यो व्यवस्थासँगै अब दोस्रो बजारमा सूचीकृत सबै संस्थाहरुका लागि एकिकृत नीति बनेको हो । यसअघि बैंक तथा वित्तीय संस्थाका लागि मात्र सेयर कारोबार रोक्का गर्ने नीतिगत व्यवस्था थियो । निर्देशिका लागू भएपछि मर्जरका नाममा लामो समयसम्म सेयर कारोबार रोक्का गर्न नपर्ने भएकाले लगानीकर्ता सेयर किनबेचबाट लामो समय वञ्चित हुनुपर्ने बाध्यता हटेको छ ।
© 2025 All right reserved to khabarcnter.com | Site By : Sobij
