बाँके पश्चिम क्षेत्रमा रहेका २४ जिल्लाको व्यवसाय, शिक्षा, स्वास्थ्यलगायतलाई प्रत्यक्ष प्रभाव पार्ने जिल्ला हो । मङ्सिर ४ मा हुने प्रतिनिधिसभा र प्रदेशसभा चुनावमा यो जिल्लाको परिणाम आफ्नो पक्षमा पार्न सत्ताको लाभ लिइरहेका र नयाँ उम्मेदवारले आर्थिक समृद्धिको नारालाई जोड दिएका छन् । 

जिल्लाका तीनओटा निर्वाचन क्षेत्रमा केन्द्रसम्म प्रभाव पार्ने पुरानै अनुहारदेखि पूर्वपालिका प्रमुख, नयाँ अनुहार र स्वतन्त्र उम्मेदवार प्रतिस्पर्धामा छन् । चुनावी प्रचार जारी रहँदा केहीलाई विरासत र केहीलाई जिल्लामा पार्टीको अस्तित्व जोगाउने चिन्ता छ । 

स्थानीय निर्वाचन २०७९ को परिणाम हेर्दा नेकपा एमालेलाई बाँकेमा ठूलै धक्का लागेको देखिन्छ । केन्द्रमा चारदलीय गठबन्धन भए पनि बाँकेका सबै क्षेत्रमा गठबन्धन छैन । स्थानीय तहको निर्वाचनमा नेपालगञ्ज उपमहानगरपालिकामा गठबन्धन गरेर उपप्रमुख जितेको जनता समाजवादी पार्टी (जसपा)ले प्रतिनिधिसभा र प्रदेशसभाको लागि क्षेत्र नम्बर २ बाट एकल उम्मेदवारी दिएको छ । छुट्टाछुट्टै स्थानीय तहमा लडेका नेकपा एमाले र राष्ट्रिय प्रजातन्त्र पार्टी (राप्रपा) ले जिल्लामा गठबन्धन गरेका छन् । 

विरासत जोगाउने प्रयासमा गहतराज 

क्षेत्र नम्बर १ मा कोहलपुर नगरपालिका, राप्ती सोनारी गाउँपालिका र नरैनापुर गाउँपालिका पर्छन् । उक्त क्षेत्रबाट प्रतिनिधिसभा सदस्यमा ११ उम्मेदवार छन् । तीमध्ये गठबन्धनका तर्फबाट उम्मेदवारी दिएका नेपाल कम्युनिस्ट पार्टी (माओवादी केन्द्र)का महेश्वरजंग गहतराज र नेकपा एमालेका सूर्यप्रसाद ढकाल बढी चर्चामा छन् । खेलकुद मन्त्रीसमेत रहेका गहतराज यसअघि पनि निर्वाचित व्यक्ति हुन् भने ढकाल हालसम्म कुनै पनि निर्वाचनमा होमिएका छैनन् । 

२०७९ को स्थानीय तह निर्वाचनमा गठबन्धनका उम्मेदवारले एमालेको भन्दा केही बढी मत पाएका थिए । स्थानीय बासिन्दा भने एमालेले प्रतिनिधिसभा निर्वाचनमा स्थानीय तहको भन्दा बढी मत ल्याउने आकलन गर्छन् । राष्ट्रिय स्वतन्त्र पार्टीबाट उम्मेदवारी दिएका आनन्दबाबु काफ्लेले गठबन्धनकै भोट काट्ने आकलन गरिन्छ । 

राई र राणाको कडा टकराव 

क्षेत्र नम्बर २ मा कडा प्रतिस्पर्धा हुने देखिन्छ । त्यहाँ राप्रपा र एमालेको गठबन्धनबाहेक सबैले एकल उम्मेदवारी दिएका छन् । यो क्षेत्रबाट १६ जनाले उम्मेदवारी दिएका छन्, जसमा ५ जना स्वतन्त्र छन् ।

उम्मेदवारी दिएकामध्ये जसपाका उम्मेदवार पूर्वमन्त्री मोहम्मद इश्तियाक राई र राप्रपाका डा. धवलशमशेर राणाबीच कडा टक्कर छ । राणा नेपालगञ्जका पूर्वमेयर हुन् । नेपाली कांग्रेसका उम्मेदवार सुदीपनरसिंह राणाको तयारी पनि राम्रै देखिन्छ । यो स्वर्गीय सुशील कोइरालाले चुनाव लड्ने गरेको क्षेत्र पनि हो । 

स्थानीय चुनावमा गठबन्धनले नेपालगञ्ज उपमहानगरपालिकामा राम्रै मत ल्याएको थियो । उक्त समयमा कांग्रेसबाट प्रमुखमा उम्मेदवारी दिएका प्रशान्त विष्टले २३ हजार ४ सय ६० मत पाउँदा उनका निकटतम प्रतिद्वन्द्वी नेकपा एमालेका पशुपतिदयाल मिश्राले ११ हजार ६ सय ७५ पाएका थिए । राप्रपाका नन्दलाल वैश्यले ७ हजार ५ सय ९८ मत पाएका थिए । 

उपप्रमुखमा पनि जसपाका कमरुद्दीन राईले १७ हजार ९ सय ५० मत पाउँदा उनका प्रतिद्वन्द्वी नेकपा एमालेकी शान्तिदेवी ढकालले १० हजार ९ सय १५ र राप्रपाकी विन्दु चर्तिमगरले १० हजार १ सय ३५ मत पाएकी थिइन् । प्रतिनिधिसभामा नेपालगञ्जका २३ वडामध्ये वडा नम्बर १६ र १७ भने क्षेत्र नम्बर ३ मा पर्छन् ।  

यसरी हेर्दा राप्रपाबाट उम्मेदवारी दिएका डा. राणाले राप्रपा र एमालेको गरेर १८ हजार मतको अपेक्षा गरिरहँदा जसपा र कांग्रेसको गठबन्धनले स्थानीय तहमा पाएको २३ हजार मत बाँडिने देखिन्छ । 

कक्षपतिलाई टक्कर दिँदै राठौर 

२०७९ को स्थानीय चुनावमा कांग्रेसले जिल्लामा सबैभन्दा राम्रो मत पाएको क्षेत्र ३ नम्बर हो । त्यहाँ गठबन्धन भएको थियो । उक्त क्षेत्रबाट प्रतिनिधिसभा सदस्यमा कांग्रेसका सहमहामन्त्री किशोरसिंह राठौरले उम्मेदवारी दिएका छन् । 

प्रतिनिधिसभा सदस्यमा क्षेत्र नम्बर ३ बाट ९ जनाले उम्मेदवारी दिएका छन् । प्रतिस्पर्धाचाहिँ राठौर र नेकपा एमालेका किस्मतकुमार कक्षपतिबीच हुने देखिन्छ । कक्षपति नेकपा एमालेका जिल्ला अध्यक्ष हुन् । उनी २०७४ को स्थानीय निर्वाचनमा खजुरा गाउँपालिकाको अध्यक्ष निर्वाचित भएका थिए ।(आर्थिक अभियान)