बलेफी हाइड्रोपावर कम्पनीको आइपीओमा हालसम्म १७ करोड ५६ लाख ३० हजार रुपैयाँ बराबरको आवेदन परेको छ । सीडीएसका सोमबार (फागुन २३ गते) सम्ममा ७ हजार १४३ जनाले १७ लाख ५६ हजार ३०० कित्ताका लागि आवेदन दिएका हुन् ।
जसमा सिन्धुपाल्चोक जिल्लाको जुगल गाउँपालिका वडा नं. २, ३ र ४ का २३ सय ७४ जना स्थानीयले ८ लाख ६० हजार ९८० कित्ता र प्रसारण लाइन प्रभावित स्थानका ४७ सय ६९ जनाले ८ लाख ९५ हजार ३२० कित्ता सेयरका लागि आवेदन दिएका छन् ।
कम्पनीले माघ २७ गतेदेखि आयोजना प्रभावित स्थानीय बासिन्दालाई आइपीओ बिक्री खुला गरेको हो । कम्पनीले स्थानीयलाई जारी पुँजीको १०% अर्थात १८ लाख २७ हजार ९७० कित्ता सेयर निष्कासन गरेको हो । जसमध्ये १० लाख ९६ हजार ७८२ कित्ता सेयर सिन्धुपाल्चोक जिल्लाको जुगल गाउँपालिका वडा नं. २, ३ र ४ का स्थानीयलाई छुट्याइएको छ ।
बाँकी ७ लाख ३१ हजार १८८ कित्ता सेयर भने आयोजनाको १३२ केभी प्रसारण लाइनबाट प्रभावित जुगल गाउँपालिका वडा नं. ५ र ७, बलेफी गाउँपालिका वडा नं १, ३, ६ र ७ तथा सुनकोशी गाउँपालिका वडा नं. ७ का स्थानीयलाई छुट्याइएको छ । स्थानीयले प्रतिकित्ता १०० रुपैयाँका दरले न्यूनतम १० कित्तादेखि अधिकतम १ लाख कित्तासम्मका लागि आवेदन दिन सक्नेछन् ।
आयोजना प्रभावितहरुलाई निष्कासन गरिएको सबै सेयर बिक्री नभएमा बाँकी रहेको सेयर सर्वसाधारणलाई थप गरी बिक्री खुला गरिने कम्पनीले जानकारी गराएको छ । यो आइपीओ फागुन २६ गतेसम्म गतेसम्म खुला रहनेछ ।
