२०८३ आश्विन २९ गते बिहिवार
२०८३ आश्विन २९ गते बिहिवार
.gif)
काठमाडौं । चीनतर्फबाट आएको बाढीका कारण नागढुंगा–मुग्लिन सडक अवरुद्ध भएपछि काठमाडौं उपत्यकामा एलपी ग्यास आपूर्ति सहज बनाउन वैकल्पिक उपाय खोजिएको छ ।
मुख्य सडक अवरुद्ध हुँदा ग्यास बुलेट काठमाडौं आउन नसकेपछि उपत्यका बाहिरका ग्यास उद्योगबाट सिलिन्डर भरेर वैकल्पिक सडकमार्फत ट्रकमा ढुवानी गर्ने तयारी गरिएको हो ।
यस विषयमा मकवानपुर जिल्ला प्रशासन कार्यालयमा छलफल भएको छ । छलफलमा प्रमुख जिल्ला अधिकारी, प्रहरी उपरीक्षक, सडक डिभिजनका प्रतिनिधि, नारायणी ट्रक व्यवसायी समितिका पदाधिकारी तथा एलपी ग्यास व्यवसायीहरू सहभागी थिए ।
नेपाल आयल निगमका कार्यकारी निर्देशक नागेन्द्र शाहका अनुसार मुख्य राजमार्ग अवरुद्ध भएपछि काठमाडौं उपत्यकामा ग्यासको अभाव देखिन थालेकाले वैकल्पिक व्यवस्था अघि सारिएको हो । उनका अनुसार काठमाडौं बाहिर रहेका ग्यास उद्योगमा सिलिन्डर भरेर ट्रकमार्फत उपत्यकामा पठाउने तयारी भइरहेको छ ।
मंगलबार मात्रै काठमाडौं बाहिर बोटलिङ गरिएका करिब ४ हजार सिलिन्डर ग्यास काठमाडौं ल्याइएको शाहले जानकारी दिए ।
बाढीका कारण मुख्य सडक कहिले खुल्छ भन्ने निश्चित नभएकाले उपभोक्तालाई ग्यास अभाव हुन नदिन स्थानीय प्रशासन र व्यवसायीसँग समन्वय गरेर वैकल्पिक रुटबाट ढुवानी सुरु गर्न लागिएको हो ।
ग्यास ढुवानीका लागि कान्तिराजपथ, त्रिभुवन राजपथलगायत वैकल्पिक मार्ग प्रयोग गर्ने विषयमा छलफल भइरहेको छ । बैठकले ट्रकमार्फत ग्यास ढुवानी गर्दा आवश्यक सुरक्षा व्यवस्था तथा सडक मार्गलाई सहज बनाउने विषयमा निर्णय गर्ने बताइएको छ ।
© 2026 All right reserved to khabarcnter.com | Site By : Sobij
