२०८३ आश्विन ३० गते शुक्रवार
२०८३ आश्विन ३० गते शुक्रवार
.gif)
काठमाडौं । अनिश्चितकालका लागि स्थगित भएको प्रतिनिधिसभाको बैठक भोलि बस्ने भएको छ । प्रतिनिधिसभाको कार्यव्यवस्था परामर्श समितिको बैठकले भोलि बैठक आह्वान गर्ने निर्णय गरेको हो ।
भोलिको बैठकमा सभामुख डोलप्रसाद अर्यालले देशमा उत्पन्न महाविपद्का विषयमा विशेष प्रस्ताव पेस गर्ने तय भएको छ । उक्त प्रस्तावमाथि प्रतिनिधिसभामा सहभागी सबै दलका नेताहरूले धारणा राख्नेछन् ।
गत भदौ १० गते रसुवाको भोटेकोशी नदीमा आएको विनाशकारी बाढीले ठूलो जनधनको क्षति पुर्याएपछि प्रतिनिधिसभाको बैठक अनिश्चितकालका लागि स्थगित गरिएको थियो ।
बाढीसँगै आएको गेग्रानका कारण भोटेकोशी नदीको बहाव एक्कासि बढ्दा नदी आसपासका बस्ती, सडक, पुल तथा जलविद्युत् आयोजनामा ठूलो क्षति पुगेको छ । बाढीका कारण कैलाश हिमाल तथा मानसरोवर यात्रामा रहेका पर्यटकसमेत प्रभावित भएका छन् ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार मंगलबार बिहान ९ बजेसम्म बाढीमा परी ९८७ जनाको शव फेला परेको छ । रसुवामा २७, नुवाकोटमा ९५, धादिङमा ५५, गोरखामा ६५, तनहुँमा ३८, नवलपरासी पूर्वमा २१६, नवलपरासी पश्चिममा १७० र चितवनमा ३२१ जनाको शव फेला परेको प्राधिकरणले जनाएको छ ।
प्राधिकरणका अनुसार अझै ३ हजार ९१६ जना सम्पर्कविहीन छन् भने २७९ जना घाइते छन् । हालसम्म ११ हजार ८१४ जनाको उद्धार गरिएको छ ।
उद्धार, राहत तथा पुनःस्थापनाका लागि नेपाली सेना, नेपाल प्रहरी र सशस्त्र प्रहरीका गरी २० हजार ८१९ सुरक्षाकर्मी परिचालन गरिएको छ । जसमा नेपाली सेनाका ८ हजार ७२२, नेपाल प्रहरीका ७ हजार ८९४ र सशस्त्र प्रहरीका ४ हजार २०३ जना छन् ।
भोलिको प्रतिनिधिसभा बैठकमा महाविपद्बाट भएको क्षति, खोजी तथा उद्धार, राहत र पुनःस्थापनाका विषयमा सांसदहरूले धारणा राख्ने अपेक्षा गरिएको छ ।
© 2026 All right reserved to khabarcnter.com | Site By : Sobij
