काठमाडौं । रसुवा बाढीले बगाएको काठमाडौं धादिङबेंसी जोड्ने फुर्केखोला पुललाई तत्काल सञ्चालमा ल्याउन कठिन देखिएको छ । बाढीले धादिङको सदरमुकाम जोड्ने फुर्केखोलाको पुल बगाएपछि धादिङवेशी जाने वैकल्पिक सडकमार्ग खोजिएको सडक विभागले जनाएको हो । 

फुर्केखोलमा तत्काल बेलीब्रिज राख्न सक्ने स्थिति नदेखिएको सडक विभागका महानिर्देशक डा। विजय जैसीले जानकारी दिएका छन्। उनकाअनुसार बाढीले ११८ मिटर लामो स्टिल प्लेट गर्डर पुलसँगै एउटा पियरसमेत बगाएको छ । पुलको स्थलगत अनुगमन गर्दै उहाँले फुर्केखोलामा तत्काल बेलीब्रिज राखेर सडक सञ्चालन गर्न समस्या रहेको बताएका छन् । 

तत्कालका लागि बेलीब्रिज राख्ने सम्भावनाबारे अध्ययन भइरहेको भएपनि पुलको लम्बाइ र एउटा पियर बगाएको कारण उपलब्ध बेलीब्रिजले नदीको दूरी पूरा गर्न नसक्ने उनको भनाई छ । यद्यपी पुल सञ्चालनको लागी विभिन्न वैकल्पिक उपायहरुका बारेमा सडक विभागले अध्ययन गरिरहेको उनले जानकारी दिएका छन् । विभागले पुलको विस्तृत मापन गर्न प्राविधिक टोली खटाउने उनले बताएका छन् । 

प्राविधिक अध्ययनपछि मात्रै पुल कसरी र कति समयमा सञ्चालनमा ल्याउन सकिन्छ भन्ने टुंगो लाग्नेछ । उनकाअनुसार उपलब्ध संरचनालाई प्रयोग गरेर नयाँ डेक निर्माण गर्ने वा हालको पुलसँग जोडेर नयाँ पुल निर्माण गर्नुपर्ने विकल्पमा विभागले अध्ययन गर्नेछ । पुरानै संरचनालाई प्रयोग गरेर नयाँ डेक माथि राखेर संरचना जोड्न पनि सकिने उनको भनाई छ । 

तर त्यसो गर्न नसकिएमा नयाँ पुल पनि बनाउनुपर्ने हुन सक्ने उनको भनाई छ । स्थायी पुल निर्माणका लागि प्राविधिक अध्ययनपछि आवश्यक प्रक्रिया अघि बढाइने उनले जानकारी दिएका छन् ।

उनले भने, ‘यो हाम्रो ठूलो र महत्वपूर्ण लाइफलाइन ब्रिज थियो । मित्रराष्ट्रको सहयोगमा धेरै पहिला निर्माण भएको राम्रो खालको स्टिल प्लेट गर्डर ब्रिज थियो । अस्तिको ठूलो र डिभास्टेटिङ खालको वर्षा, बाढी तथा पहिरोले यो पुल बगाएर लग्यो । यो पुल ११८ मिटर लामो थियो, पुलको एकातिरको एउटा पियरसमेत बाढीले बगाएको छ । अहिले तत्काल यातायात सञ्चालनका लागि बेली ब्रिज राख्न सकिन्छ कि भनेर हामीले हेरिरहेका छौँ । तर, पुलको लम्बाइ र पियरको अवस्थालाई हेर्दा तत्काल बेली ब्रिज राख्न केही कठिन हुने देखिएको छ । यद्यपि, हामी यसको ठ्याक्कै मापन गर्न एउटा प्राविधिक टोली पनि पठाउँदैछौँ । सम्भव भएमा बेली ब्रिज राखेरै तत्काल यातायात सञ्चालन गर्ने हाम्रो विचार थियो । तर, अहिले स्थलगत निरीक्षण गर्दा लामो स्पानको बेली ब्रिज यहाँ उपलब्ध हुने अवस्था देखिएन । छोटो स्पानका बेली ब्रिजलाई दुईतिरको पियरसँग जोड्दा पनि आवश्यक लम्बाइ हामीसँग भएको बेली ब्रिजभन्दा बढी हुने देखिन्छ । त्यसैले तत्काल बेलीब्रिज राख्न सकिने अवस्था देखिएको छैन । अब हामी दुईवटा विकल्पमा जान सक्छौँ । पहिलो, अहिले रहेका संरचनालाई प्रयोग गरेर त्यसमाथि नयाँ डेक राख्न सकिन्छ । त्यसलाई स्थायी प्रकृतिको संरचनाका रूपमा निर्माण गर्न सकिन्छ । दोस्रो, यही पुलसँग जोडेर नयाँ पुल निर्माण गर्नुपर्ने हुन सक्छ । यस विषयमा हामी तत्कालै विस्तृत प्राविधिक अध्ययन गर्छौँ । त्यसपछि कति दिनमा र कुन तरिकाले यातायात सञ्चालन गर्न सकिन्छ भन्ने विषयमा स्पष्ट भन्न सक्छौँ । यो पुल बनाउनैपर्छ । त्यसका लागि आवश्यक प्राविधिक अध्ययन गरेर तुरुन्तै निर्माण प्रक्रियामा जाने विषयमा हामी चाँडै निर्णय गर्छौँ ।’