२०८३ आश्विन ३० गते शुक्रवार
२०८३ आश्विन ३० गते शुक्रवार
.gif)
काठमाडौं । नेपाल–चीन सीमावर्ती क्षेत्र तिब्बततर्फ चीनको छोचेन खोला र पुरेपू त्साङ्पो नदीको संगम छेउमा बनेको ठूलो तालबाट ग्लेसियर फुटेर पानी ओभरफ्लो भएको सरकारले जनाएको छ ।
बिहीबार मन्त्रिपरिषद् बैठकपछि सञ्चारकर्मीसँग कुरा गर्दै सरकारका प्रवक्ता एवं शिक्षामन्त्री सस्मित पोखरेलले ड्याम फुटेको नभई ग्लेसियर फुटेका कारण लेदोसहितको पानी ओभरफ्लो भएको जानकारी दिए ।
उनका अनुसार घटनाका कारण तत्काल ठूलो जोखिम देखिएको छैन । यद्यपि सम्भावित जोखिमलाई मध्यनजर गर्दै सतर्क रहन आग्रह गरिएको छ ।
‘कतै ड्याम फुटेको भन्ने छैन । सामान्य ग्लेसियरहरू फुटेको हुनाले धेरै ठाउँमा पानी लेदोसहितको ओभरफ्लो भएको छ,’ प्रवक्ता पोखरेलले भने, ‘त्यस्तो ठूलो जोखिम तत्कालै देखिएको छैन, तर सतर्क हुनका लागि भने आवश्यक छ ।’
सरकारले घटनाबारे परराष्ट्र मन्त्रालयमार्फत चीन सरकारसँग निरन्तर संवाद गरिरहेको जनाएको छ । चिनियाँ पक्षबाट पनि तत्काल ठूलो जोखिम नरहेको जानकारी प्राप्त भइरहेको प्रवक्ता पोखरेलले बताए ।
यसैबीच, रसुवाका प्रमुख जिल्ला अधिकारी नरेन्द्र परियारले चीनतर्फ जमेको ताल फुटेको सूचना चिनियाँ पक्षबाट प्राप्त भएको बताएका छन् ।
घटनापछि नदी आसपासका जोखिमपूर्ण क्षेत्रमा रहेका नागरिकलाई सुरक्षाकर्मीहरूले सुरक्षित स्थानतर्फ सारिरहेका छन् । सरकारले सम्भावित जोखिमलाई ध्यानमा राख्दै नदी तटीय क्षेत्रमा रहेका नागरिकलाई सतर्क रहन आग्रह गरेको छ ।
© 2026 All right reserved to khabarcnter.com | Site By : Sobij
