२०८२ मंसिर १७ गते बुधवार
२०८२ मंसिर १७ गते बुधवार
काठमाडौं । गुल्मीको मालिका गाउँपालिकामा छोराले धारिलो हतियार प्रहार गरी बुवाको हत्या गरेका छन् । मालिका–३, म्यालका २३ वर्षीय भोटबहादुर विकले शनिबार (कात्तिक १५) ५२ वर्षीय बुवा धनबहादुरको हत्या गरेका जिल्ला प्रहरी कार्यालयका सूचना अधिकारी गंगाबहादुर सारूले जानकारी दिए ।
भोटबहादुरले ४९ वर्षीया आमा दिलमायालाई पनि धारिलो हतियार प्रहार गरी गम्भीर घाइते बनाएका छन् । सूचना अधिकारी सारूका अनुसार, घटनास्थलमै धनबहादुरको मृत्यु भएको थियो ।
दिलमायाको टाउकोमा गम्भीर चोट लागेको छ । गुल्मी अस्पतालमा उनको प्रारम्भिक उपचार गरिएको थियो । थप उपचारका निम्ति उनलाई प्रादेशिक अस्पताल बुटवल पठाइएको प्रहरीले जनाएको छ ।
घटनामा संलग्न मानसिक सन्तुलन ठिक नभएका भनिएका छोरा भोटबहादुरलाई प्रहरीले नियन्त्रणमा लिएको छ । घटनाका बारेमा थप अनुसन्धान भइरहेको प्रहरीले जनाएको छ ।
© 2025 All right reserved to khabarcnter.com | Site By : Sobij
