२०८२ माघ ११ गते आइतवार
२०८२ माघ ११ गते आइतवार
गोरखा । गोरखा नगरपालिका–७ सतिपिपलको एक घरबाट प्रहरीले बरामद गरेको क्वार्ज क्रिष्टल (एक पारदर्शक ढुंगा) गोरखा दरवार परिसरमा गोप्य रुपमा राखिदिन माग गरिएको छ ।
गुरु गोरक्षधाम सिद्धाश्रम केन्द्र गोरखाले बिहिबार प्रमुख जिल्ला अधिकारीलाई ध्यानाकर्षण पत्र बुझाउँदै अलौकिक सम्पत्तिको रक्षाको लागि यथाशीघ्र निर्णय गरिदिन माग समेत गरेको छ ।
प्रहरीले बरामद गरी ल्याएको शिला प्रकाश दिने उक्त ढुंगाको बारेमा जानकारहरुसँग कुराकानी गर्दा उक्त ढुंगा अलौकिक शिला रहेको र तत्कालिन समयमा गोरखा भूमिबाट दैविक शक्ति जगाई नेपाल एकीकरणका बखत गोर्खाली सेनाले प्रयोग गरी गोरखा भूमिमा नै स्थापना गरेको हुनसक्ने ध्यानाकर्षण पत्रमा भनिएको छ ।
उक्त शिलालाई चन्द्रमान शाहीको पुर्खाले आफ्नो कुल देवता मानी पुजा गर्दै आएको र उक्त शिला दरौदी नदी त्यत्तिकै कटाउन हुदैन भन्ने भनाइ समेत रहेको बताइएको छ । विभिन्न वहाना बनाई उक्त ढुंगा गोरखाबाट बाहिर जाने वातावरण सिर्जना गरेमा अनिष्ठ समेत हुनसक्ने सिद्धाश्रम केन्द्रले जनाएको छ ।
गत असार १४ गते गोनपा–७ स्थित एक घरबाट प्रहरीले ५४ किलो तौलको उक्त ढंगा बरामद गरेको हो । अवैध रुपमा किनबेच हुन लागेको सुचनाको आधारमा ढुंगा बरामद गरिएको प्रहरीले जनाएको छ । उक्त ढुंगा अहिले जिल्ला प्रहरी कार्यालय परिसरमा रहेको छ ।
© 2026 All right reserved to khabarcnter.com | Site By : Sobij
