काठमाडौँ । ललितपुरको सातदोबाटोस्थित केन्द्रीय कार्यालय रहेको देउराली बहुउद्देश्यीय सहकारीले बचतकर्ताहरूको गुनासालाई सम्बोधन गर्दै एक विज्ञप्ति जारी गरेका छन्।

केही समयदेखि तरलताको सङ्कट खेपिरहेको उक्त सहकारी संस्थाका अध्यक्ष रविन्द्र चौलागाईँले बचतकर्ताहरूको गुनासालाई ध्यान दिँदै विज्ञप्ति जारी गरेका हुन् । 

सहकारीका सञ्चालकहरूका साथै उक्त सहकारीका अध्यक्ष चौलागाईं विरुद्ध नियोजित रूपमा केही सञ्चारमाध्यम र शक्ति लागि परिरहेको उनले विज्ञप्तिमा उल्लेख गरेका छन् । 

सहकारीले फिर्ता गर्न बाँकी केही रकमको विषयलाई लिएर सहकारीलाई मार्ग निर्देशन गर्ने सहकारी विभाग बानेश्वरले देउरालीका सञ्चालकहरूलाई बोलाई छलफल गरी बाँकी रहेको केही रकम क्रमिक रूपमा पुस मसान्तसम्म फिर्ता गरिसक्ने गरी कागजी प्रक्रिया गरिएको उनले बताएका छन् । 

सार्वजनिक गरेको निक्षेप फिर्ताको योजनामा दुई चरणमा दुई विकल्प दिएर ब्याजसहित साँवा फिर्ता गर्ने विज्ञप्तिमा उल्लेख छ। गत असार १७ गते “देउराली सहकारीको पिडित हौँ” भन्दै सहकारी रजिस्ट्रार कार्यालय गएर त्यहाँ कार्यरत कर्मचारीलाई अमानवीय व्यबहार गरी सिआइवीलाई पत्र पठाउन लगाएको र सहकारी विभागले छलफलको लागि बोलाएको विषयमा विभिन्न सञ्चार माध्यमले अफवाह फैलाएकोले उनको आरोप छ । 

सहकारीको बचतकर्ता अर्थात पिडित पक्ष, सञ्चालक समिति र सहकारी विभागबिच भएको त्रिपक्षिय छलफल पश्चात् आगामी ६ महिनाको बचत फिर्ता कार्ययोजना बुझाएकोले अनावश्यक अफवाहको पछि नलाग्न अध्यक्ष चौलागाईँको आग्रह छ । 

“बैङ्क तथा वित्तीय संस्थाको विषयमा पनि सबैसँग सम्पर्कमा रहि तदारुपताका साथ कार्य गरिहेको हुनाले यो सबै अफवाह हो भन्ने कुरा पुष्टि गरेका छौँ” विज्ञप्तिमा भनिएको छ। 

“बचतकर्ताहरुको आगामी साउन महिनामा ब्याजको केही रकम र पुस मसान्तसम्ममा बाँकी रकम, नगद तथा जग्गाबाट फिर्ता गरिने प्रतिबद्धता व्यक्त गर्दछौँ,” अध्यक्ष चौलागाईद्वारा जारी विज्ञप्तिमा उल्लेख छ । 

संस्थालाई अप्ठ्यारो परेको बेला आर्थिक कारोबारमा जोडिएर ठूलो मात्र नगद तथा सम्पत्ति लिने अनुचित लेनदेनको कारोबार गर्नेलाई मुद्दा दर्ता गरेको उनले बताए । 

साथै, उनले सदस्यहरूको साथ र सहयोगमा सहकारी विभागले तोकिएको समय अगावै बाँकी रहेको बचत रकम फिर्ता हुने प्रतिबद्वता जनाएका छन्।

अध्यक्ष चौलागाईंले सहकारीका कर्मचारीहरुका साथै ऋणीहरुलाई समेत सम्पर्कमा आउन र सहकारी विभागले दिएको निर्देशन अनुसार आगामी साउन मसान्तभित्र ऋणीहरूले आफ्नो ऋणको ब्याज रकम फिर्ता गर्न आग्रह गरेका छन् । सहकारीको ऐननियम अनुसार कारबाही अगाडि बढाउने उनले बताए ।