२०८२ माघ १३ गते मंगलवार
२०८२ माघ १३ गते मंगलवार
काठमाडौँ । सर्वोच्चको अदालतको गेटअगाडि प्रदर्शन गर्न खोजेपछि आरती रावल र बिनु यादव पक्राउ परेका छन् । सेतो साडी लगाएर सर्वोच्चअगाडि प्रदर्शन गर्न खोजेपछि प्रहरीले उनीहरुलाई नियन्त्रणमा लिएको हो ।
आफ्ना पति भुवन गिरीलाई वैवाहिक बलात्कारको कसुरमा कारवाहीको माग गर्दै रावल बिनु यादवको साथमा सर्वोच्च अदालतअगाडि पुगेकी थिइन् । त्यहाँ प्रदर्शन गर्नै लागेको अवस्थामा प्रहरीले नियन्त्रणमा लिई उनीहरुलाई प्रहरी वृत्त सिंहदरवारमा राखिएको छ ।
न्यायाधीश भुवन गिरीविरुद्ध वैवाहिक बलात्कारको कसुरमा मुद्दा दर्ता भएलगत्तै उनी निलम्बनमा परेका थिए । काठमाडौं र रुपन्देही जिल्ला अदालतमा वैवाहिक बलात्कारको मुद्दा विचाराधीन रहेकै अवस्थामा अदालतलाई दबाव दिने उद्धेश्यले उनीहरुले प्रदर्शन गर्न खोजेका थिए ।
गिरी यसअघि नै धरौटीमा रिहा भइसकेका छन् । सामान्यत : वैवाहिक बलात्कारको मुद्दामा थुनामा नराखी धरौटीमा रिहा गर्ने गरिन्छ । तर गिरीलाई थुनामै राख्नुपर्ने र दोषी ठहर गर्नुपर्ने भन्दै रावल अदालतलाई प्रभावित बनाउन प्रदर्शनमा उत्रिएकी हुन् ।
आरती रावलविरुद्ध कपिलवस्तु जिल्ला अदालतमा चोरी तथा बाँके जिल्ला अदालतमा सरकारी कागजात कीर्ते र सम्बन्धविच्छेदको मुद्दासमेत विचाराधीन अवस्थामा रहेका छन् । निलम्बित न्यायाधीश गिरीले आफूलाई दबावमा राखी जबरजस्ती विवाह गर्न बाध्य पारिएको र अहिले पनि पटकपटक ब्ल्याकमेल र मानसिक यातना दिएको दावी गरेका छन् ।
© 2026 All right reserved to khabarcnter.com | Site By : Sobij
