२०८२ मंसिर १३ गते शनिवार
२०८२ मंसिर १३ गते शनिवार
काठमाडौँ । काभ्रेपलाञ्चोकको विकट डाँडापारि स्थित महाभारत गाउँपालिकाका किसानलाई आम्दानी वृद्धि गराउन नि : शुल्क रूपमा कफीका बिरुवा वितरण गरिएको छ । गाउँपालिकाले आर्थिक उपर्जनको लागि वैकल्पिक व्यवसाय कफी खेती हुने भएकाले आम्दानीको स्रोत बढाउन बिरुवा वितरण गरेको हो ।
वडा नं. १ का वडाअध्यक्ष कान्छामान जिम्बाले भौतिक विकाससँगै आर्थिक विकासका रूपमा कफीलाई अगाडि बढाउने अभियान थालिएको बताए ।
मकै र कोदो खेती गरेको ठाउँमा कफी खेतीको उत्पादनले झन्डै दोब्बर आम्दानी लिएको पाएकाले पनि परम्परागत खेतीबाट फरक तरिकाले कफीका साथै फलफूल खेतीतर्फ किसानलाई डोर्याउने काममा वडाले काम गरिरहेको उनले बताए ।
किसानले पनि आम्दानीका लागि खेतीमा विकल्प सोचिरहेका बेला कफी उत्पादन प्रमुख हुने देखिएको उनको भनाइ छ ।
महाभारत क्षेत्रमा कफीको राम्रो उत्पादन हुने र अहिलेसम्ममा परम्परागत रूपमा मकै, कोदो लगायतका खेती गर्दै आएका यहाँका किसानको मुख्य आम्दानीको स्रोत कफीमा देखिएकाले बिरुवा वितरणलाई अभियानकै रूपमा अगाडि बढाएको अध्यक्ष जिम्बाले बताए ।
अहिले पालिकाका सबै वटामा सहकारी संस्थामार्फत आर्थिक वर्ष २०७९/८० मा मात्रै एक लाख कफीका बिरुवा वितरण गरेको उनले बताए ।
“महाभारतको आर्थिक समृद्धिको आधार कफीबाट हुने सम्भावना रहेको पाइएका कारण उत्पादनमा किसानलाई जोड्न यस वर्ष बिरुवा वितरणमा जोड दिएका छौँ”, उनले भने, “यसअघि पालिकाले कफी उत्पादनको विषयमा जानकारी, त्यसको बजारीकरण र गुणस्तरीय उत्पादनका लागि मेशिन वितरण लगायतका काम गरिसकेका छौँ ।”
यहाँका केही किसानले आफ्नै लगानीमा सामान्य किसिमले कफी खेती गर्दै आएको र आम्दानी पनि राम्रो हुने पाएपछि किसान पनि त्यसतर्फ आकर्षित भएका छन् । आम्दानी पनि राम्रो हुने, पालिकाले पनि निःशुल्क रूपमा बिरुवा वितरण गरेपछि यहाँका किसान खुसी भएका छन् ।
कफी उत्पादनलाई प्रोत्सान दिन यस वर्षबाट वडा नं. ३, ५ र ८ वडामा नर्सरी समेत स्थापना गरेको पालिकाले जनाएको छ । त्यस्तै, कृषि क्षेत्रमा किसानलाई अग्रसर गराउन ट्र्याक्टर, स्प्रेपम्प, प्लास्टिक टनेल र आवश्यकताका आधारमा किसानको मागमा आधारित तालिमसमेत उपलब्ध गराइँदै आएको पालिकाले जनाएको छ ।
इलाममा चिया हेर्न नेपालीसँगै विदेशी पर्यटक गए जसरी महाभारतमा कफी हेर्ने पर्यटक भित्र्याउने लक्ष्यका साथ काम गरिरहेको गाउँपालिकाले जनाएको छ ।
© 2025 All right reserved to khabarcnter.com | Site By : Sobij
