भारतीय रिजर्भ बैंक (आरबीआई) ले मंगलबार (कात्तिक १५ गते) देखि डिजिटल रुपैयाँको पाइलट प्रोजेक्ट सञ्चालनमा ल्याएको छ । आरबीआईले पहिलो चरणमा ‘होलसेल सेगमेन्ट’ का लागि डिजिटल रुपैयाँको पाइलट प्रोजेक्ट सञ्चालनमा ल्याएको इकोनोमिक टाइम्सले रिपोर्ट गरेको छ । यससँगै आरबीआई आफ्नै भर्चुअल मुद्राको पाइलट प्रोजेक्ट सुरु गर्ने विश्वको प्रमुख केन्द्रीय बैंकमध्ये एक बनेको छ ।
मंगलबारदेखि थोक डिजिटल रुपैयाँ परीक्षणको आधारमा प्रयोग गरिने भारतको केन्द्रीय बैंकले जानकारी गराएको छ । प्रारम्भिक चरणमा सरकारी धितोपत्रहरुको कारोबार सेटलमेन्टका लागि डिजिटल रुपैयाँको प्रयोग गरिने भएको छ । डिजिटल रुपैयाको खुद्रा संस्करणको लागि पाइलट प्रोजेक्ट भने आगामी एक महिनाभित्रै सञ्चालनमा ल्याइने आरबीआईले जानकारी गराएको भारतीय सञ्चार माध्यमहरुले उल्लेख गरेका छन् ।
बिटक्वाइनजस्ता निजी डिजिटल मुद्राहरुलाई अनुमति दिँदा वित्तीय स्थायित्वमा खतरा उत्पन्न हुने ठहर गर्दै भारतले आफ्नै ‘केन्द्रीय बैंक डिजिटल करेन्सी’ प्रचलनमा ल्याउन लागेको हो । डिजिटल रुपैयाँ (इ–रुपी) को थोक प्रयोजनको पाइलट प्रोजेक्टमा स्टेट बैंक अफ इन्डिया, बैंक अफ बरोदा, युनियन बैंक अफ इन्डिया, एचडीएफसी बैंक, आइसीआइसीआई बैंक, कोटक महिन्द्रा बैंक, यस बैंक, आइडीएफसी फर्स्ट बैंक र एचएसबीसी सहभागी रहेका छन् ।
आइबीआईले विगत केही समयदेखि नै केन्द्रीय बैंक डिजिटल मुद्राको फाइदा र बेफाइदाहरुको अनुसन्धान गरिरहेको छ । यसलाई चरणबद्ध रूपमा कार्यान्वयन गर्ने रणनीतिमा काम गरिरहेको आइबीआईले यसअघि पनि जानकारी गराएको थियो । वित्तीय प्रणालीमा न्यूनतम वा कुनै अवरोध नहोस् भनेर डिजिटल रुपैयाँको प्रयोगका केसहरु जाँच गरिरहेको पनि आरबीआईले जानकारी गराएको छ । गत फेब्रुअरीमा भारत सरकारले चालु आर्थिक वर्ष भित्रै डिजिटल रुपैयाँ सार्वजनिक गर्ने बताएको थियो ।
