कुन प्रदेशमा कति हुँदैछ आर्थिक वृद्धि ?

बैशाख २२, २०७९ बिहिवार

4.3K

केही दिनअघि मात्र मुलुकको कुल गार्हस्थ उत्पादन (जीडीपी) को आकार ४८ खर्ब ५१ अर्ब ३० करोड हाराहारी पुगेको घोषणा गरेको तथ्याङ्क विभागले बिहीबार प्रदेशस्तरीय योगदानको समेत तथ्याङ्क सार्वजनिक गरेको छ ।

विभागका अनुसार प्रदेशगत राष्ट्रिय उत्पादनसँगै आर्थिक वृद्धिदरमा सबैभन्दा बढी योगदान बागमती प्रदेशको नै छ । यद्यपि, अघिल्लो वर्षको तुलनामा यस वर्ष यस प्रदेशको पर्फमेन्समा केहीँ ह्रास आएको छ ।

गत आर्थिक वर्ष २०७७/७८ मा नै कुल गार्हस्थ उत्पादनमा ३७.७ प्रतिशतको योगदान रहेको बागमती प्रदेशको यो वर्ष घटेर ३६.९ प्रतिशतमा झरेको छ । यद्यपि, समग्रमा प्रदेशको आर्थिक गतिविधि बढेपनि यस वर्ष अन्य प्रदेशको योगदान बढ्दा बागमती प्रदेशको केही कम देखिन गएको हो ।

विभागको तथ्याङ्क अनुसार यस वर्ष साढे ४८ खर्ब हाराहारी पुगेको राष्ट्रिय उत्पादनमा बागमती प्रदेशको मात्रै १७ खर्ब ९० अर्ब ६८ करोड रुपैयाँ बराबरको योगदान रहेको छ । अघिल्लो वर्षको सोही अवधिमा यस प्रदेशको योगदान १५ खर्ब ६८ अर्ब ४१ करोड बराबरको रहेको थियो ।