शुक्रबारबाट आवेदन दिन मिल्ने  सिवाईसी नेपाल लघुवित्त वित्तीय संस्थाले कुल ३ लाख ९५ हजार ३ सय ३६ कित्ता आईपीओ निष्कासन गरेको छ । सिवाईसीकाे आईपीओलाई केयर रेटिङ्ग नेपालले ‘केयरएनपी डबल बी माइनस इस्युअर’ रेटिङ प्रदान गरेको छ ।

यसले संस्थाको वित्तीय दायित्व बहन गर्ने क्षमतामा औषत जोखिम अथवा मध्यम जोखिम युक्त  रहेको जनाउँछ। आईपीओ निष्कासन गर्नुु पूर्व हेरिने कम्पनीको वित्तीय अवस्थाबारे केयर रेटिङ नेपालले रेटिङ दिने गर्छ । 

२०७५ असारमा पब्लिक लिमिटेड कम्पनीको रूपमा दर्ता भएको यस कम्पनीले सोही वर्षको चैतबाट वित्तीय कारोबार सुरु गरेको हो ।  लघुवित्तले गत असारमै शालीग्राम लघुवित्तलाई प्राप्ति गरेपछि एकृकित कारोबार गर्दै आएको छ । 

स्थापनाको तीन वर्षमै नेपालभर ४८ वटा जिल्लामा ७३ वटा शाखा खोलिसकेको लघुवित्तको गत आर्थिक वर्षमा मात्रै सञ्चिति नाफा ६ करोड ३१ लाख २२ हजार रुपैयाँ मात्रै रहेको थियो । यस्तो नाफा कम्पनीले आगामी आर्थिक बर्षमा ११ करोड ९० लाख र चालु आर्थिक वर्ष २०८०/८१ मा २४ करोड ४९ लाख ८ रुपैयाँ पुर्‍याउने उद्देश्य लघुवित्तले राखेको छ।  

लघुवित्तले आईपीओ निष्काशन गरी संकलन गरेको रकममा के के मा लगानी गर्ने भन्ने कुरा पनि स्पष्ट राखेको छ । जसमा १ करोड ९७ लाख ६६ हजार ८ सय रुपैयाँ पशुपालन तथा कृषि कर्जामा, ७९ लाख ६ हजार ७ सय २० रुपैयाँ खुद्रा व्यापार तथा सेवा कर्जामा र ७९ लाख ६ हजार ७ सय २० रुपैयाँ साना तथा घरेलु कर्जा लगानी गर्ने कम्पनीको योजना छ । यस्तै २८ वटा शाखा विस्तारका लागि पनि लघुवित्तले ३९ लाख ५३ हजार ३६० रुपैयाँ लगानी गर्ने उल्लेख गरेको छ ।

विपन्न परिवारका महिला तथा पुरुषहरूलाई वित्तीय रूपले साक्षर बनाउँदै ससानो उद्यम, कृषि उत्पादन, व्यापार, व्यवसाय सञ्चालन गर्न, आय स्रोत, पेसा र व्यवसा आधारमा सानो रकम लगानी गरी उत्पादनमूलक काममा सरिक गराउने उद्देश्यले सुरु भएको यो लघुवित्तले हालसम्म ६३ हजार५ सय ८० जना सदस्यहरूमा सेवा प्रदान गर्दै आएको छ । 

छोटो समयमा नै देशभर विस्तार भएको लघुवित्तको संचालक समितिमा भने ७ जना सञ्चालक रहने व्यवस्था छ । जसमा संस्थापक शेयरधनीको तर्फबाट चार जना, सर्वसाधारण शेयरधनीबाट २ जना र स्वतन्त्र सञ्चालक १ जना रहनेछन् । 

सञ्चालक समितिको अध्यक्षमा पद्यनाथ शर्मा रहेका छन्। चारतारे युवा क्लबमा लामो समयदेखि आवद्ध शर्मा वरिष्ठ अधिवक्ता समेत हुन्।

यस्तै सञ्चालक समितिमा सदस्यमा डोलिन्द्र प्रसाद शर्मा, ओम प्रकाश पौड्याल, कृष्णबहादुर थापा, सन्तोषकुमार अर्याल, सुनिता पौड्याल, सन्तोष रावल रहेका छन्।

हाल लघुवित्तको सञ्चालक समितिमा रहेका सन्तोषकुमार अर्याल स्वतन्त्र सञ्चालक हुन्। बाँकी ६ जना भने संस्थापक शेयरधनीहरूबाट सञ्चालक समितिमा रहेका छन्। आईपीओ निष्कासन पश्चात सर्वसाधारण शेयरधनीहरूबाट पनि सञ्चालक चयन हुनेछ।