२०८२ मंसिर १२ गते शुक्रवार
२०८२ मंसिर १२ गते शुक्रवार
पूर्वी नवलपरासीको सर्दीमा चिनियाँ लगानीमा सञ्चालित होङ्सी सिमेन्टलाई दुई महिनाभित्रमा विद्युत् दिइने भएको छ ।
उद्योगका लागि निर्माण भइरहेको बर्दघाट–सर्दी १३२ केभी प्रसारण लाइन आयोजनाको निर्माणमा केही ढिला हुने भएपछि वैकल्पिक व्यवस्था गरी विद्युत् आपूर्ति गर्न लागिएको विद्युत् प्राधिकरणले जनाएको छ ।
प्राधिकरणका कार्यकारी निर्देशक कुलमान घिसिङले वैकल्पिक व्यवस्था गरेर भए पनि दुई महिनाभित्र विद्युत् आपूर्तिको प्रबन्ध मिलाइने बताएका छन् ।
भरतपुर–बर्दघाट २२० केभी प्रसारण लाइनको बीच खण्डबाट ‘ट्यापिङ’ गरी होङ्सी सिमेन्टलाई विद्युत आपूर्ति दिन लागिएको हो । दैनिक ६ हजार मेट्रिक टन उत्पादन क्षमता रहेको यो सिमेन्ट कारखानाले उत्पादन क्षमता बढाएर १२ हजार मेट्रिक टन बनाउने गरी काम सुरु गरेको छ ।
दैनिक १२ हजार मेट्रिक टन (सिमेन्ट र क्लिंकर) उत्पादन गर्न ८० मेगावाट बिजुली चाहिने कम्पनीले जनाएको छ । कारखाना पूर्ण क्षमतामा सञ्चालन हुँदा विद्युत् प्राधिकरणलाई कम्तीमा मासिक ४५ करोड महसुल कारखानाले तिर्छ ।
कार्यकारी निर्देशक घिसिङले सिमेन्ट कारखाना उद्योगका पदाधिकारीसँग छलफल गरेर महिनाभित्र विद्युत् आपूर्ति दिन सकिने भएकाले कारखानाले पनि त्यसैअनुसार आवश्यक तयारी गर्न आग्रह गरेको पाण्डेले बताए ।
पाण्डेका अनुसार भरतपुर–बर्दघाट २२० केभी प्रसारणलाइन निर्माण कार्य अन्तिम चरणमा रहेको छ । ‘कात्तिकभित्र उद्योगलाई लाइन दिइसक्छौँ,’ पाण्डेले भने ‘विद्युत् अभावमा कारखानाको उत्पादन क्षमतालाई असर गर्दैन ।’
३६ अर्ब रुपैयाँ लगानीको होङ्सी सिमेन्ट कारखाना नेपालको सबैभन्दा ठूलो सिमेन्ट कारखाना हो । दुम्कीवासबाट १० किलोमिटर उत्तरमा होङ्सी सिमेन्टको कारखाना रहेको छ ।
© 2025 All right reserved to khabarcnter.com | Site By : Sobij
