२०८२ मंसिर १२ गते शुक्रवार
२०८२ मंसिर १२ गते शुक्रवार
काठमाडौं । प्रमुख प्रतिपक्षी दल नेकपा एमालेले लगातार पाँचौँ दिन पनि प्रतिनिधि सभा बैठकमा नाराबाजी गरेको छ ।
सोमवार प्रतिनिधि सभाको बैठक शुरू हुनासाथ एमाले सांसदहरू वेलमा गएर नाराबाजी गरेका हुन् । एमालेको नाराबाजीका बाबजुद सभामुख अग्नि सापकोटाले भने संसद्को कारवाही अगाडि बढाएका छन् ।
माधव नेपाललगायत १४ सांसदलाई पदमुक्त गर्ने एमालेको निर्णय कार्यान्वयन नगरेर पार्टी विभाजनमा भूमिका खेलेको भन्दै सभामुखप्रति एमाले आक्रोशित बनेको छ ।
यसअघि भदौ २३ गते बुधवार, २५ गते शुक्रवार र २७ गते आइतवार र २९ गते मंगलवार एमालेले प्रतिनिधि सभाको बैठकमा नाराबाजी गरेको थियो ।
विपक्षीको नाराबाजीका बाबजुद सरकारले बजेट प्रतिस्थापन विधेयक संसदमा पेश गरेको छ । सरकारले भदौ २५ गते पेश गरेको विनियोजन विधेयक सोमवार पारित गर्ने सरकारको तयारी छ ।
त्यसअघि प्रतिनिधि सभा बैठकमा विभिन्न मन्त्रालयअन्तर्गत विनियोजित शीर्षकमाथि एकमुष्ट छलफल गर्ने कार्यसूची छ । सोमवार विनियोजन विधेयक पारित भए पनि समग्र बजेट पारित गर्न भने केही दिन लाग्ने भएको छ ।
© 2025 All right reserved to khabarcnter.com | Site By : Sobij
