२०८२ कार्तिक १९ गते बुधवार
२०८२ कार्तिक १९ गते बुधवार
मोरङ । मोरङमा टिपरको ठक्करबाट नेपाली कांग्रेस धनकुटाका सचिव कृष्ण थापाको मृत्यु भएको छ ।
धनकुटाबाट झापा जाने क्रममा गएराति ७:४० बजे मोरङको विराटचोकमा टिपरले मोटरसाइकललाई ठक्कर दिँदा थापासहित दुई जनाको मृत्यु भएको प्रहरीले जनाएको छ ।
दुर्घटनामा धनकुटा पाख्रिबासका ५० वर्षीय कृष्णबहादुर थापा र सुनसरीको इटहरी उपमहानगरपालिका(४ का अन्दाजी ३५ वर्षीय दीपु शाहको मृत्यु भएको हो ।
थापा नेपाली कांग्रेस धनकुटाका जिल्ला सचिव हुन् । शाह बेलबारीस्थित एनएमबी बैंक शाखा कार्यालयका कर्मचारी हुन् ।दुर्घटनामा थापाका भाइ २७ वर्षीय भीमबहादुर थापा गम्भीर घाइते भएका छन् । उनलाई थप उपचारका लागि बीपी कोइराला स्वास्थ्य विज्ञान प्रतिष्ठान धरानले विराटनगरको विराट नर्सिङ होम रेफर गरेको छ ।
दुर्घटनामा परेको को ३६ प ५९७९ नम्बरको मोटरसाइकलका कृष्णबहादुर आफैंले चलाएका थिए । इलाका प्रहरी कार्यालय बेलबारीका अनुसार पूर्व-पश्चिम राजमार्गमा पर्ने सुन्दरहरैँचा नगरपालिका-९ विराटचोकमा पश्चिमबाट पूर्वतर्फ जाँदै गरेको टिपरले विपरीत दीशातर्फ आउँदै गरेको मोटरसाइकललाई ठक्कर दिएको थियो ।
टिपरको ठक्करबाट बेलबारीबाट इटहरीतर्फ आउँदै गरेको शाह सवार २९ प ९५५० नम्बरको मोटरसाइकल अनियन्त्रित भइ दुर्घटना भएको थियो । थापा चढेको मोटरसाइकल पनि त्यसरी नै सँगै दुर्घटना भएको प्रहरीले जानकारी दिएको छ ।
दुबै जनाको उपचारका क्रममा बीपी कोइराला स्वास्थ्य विज्ञान प्रतिष्ठान धरानमा आइतबार राति ९:३० बजेतिर मृत्यु भएको हो ।जिल्ला सचिव थापाको आजै मुलघाटस्थित तमोर नदिमा अन्त्येष्टि गरिने नेपाली कांग्रेस धनकुटाले जनाएको छ।
© 2025 All right reserved to khabarcnter.com | Site By : Sobij
