२०८२ चैत्र ३ गते मंगलवार
२०८२ चैत्र ३ गते मंगलवार
काठमाडौँ । जनता समाजवादी पार्टी (जसपा) अध्यक्ष उपेन्द्र यादव पक्ष पार्टी आधिकारिकताको दाबी गर्दै निर्वाचन आयोग जाँदैछ ।
राजनीतिक दलसम्बन्धी ऐनको व्यवस्था अनुसार आधिकारिकता दाबी गर्न आयोग जान लागिएको जसपा कार्यकारिणी सदस्य मोहोम्द इस्तियाक राईले बताए।
‘हामी आधिकारिकताका लागि निर्वाचन आयोग जाँदैछौं । आयोगले यसको छिनोफानो छिट्टै गर्नेछ भन्ने हाम्रो अपेक्षा छ’, राईले भने, ‘५१ जनाको कार्याकारिणी समितीमा हाम्रो पक्षमा स्पष्ट बहुमत छ । बहुमतको निर्णयलाई आयोगले स्वीकार गर्नुपर्छ ।’
उपेन्द्र पक्षले जसपा कार्यकारिणी बैठक बिहिबार बोलाएको थियो । बिहीबारको बैठकमा ३० जनभन्दा बढीको उपस्थिति रहेको उपेन्द्र पक्षको दाबी छ ।
यसअघि उपेन्द्र पक्षले अर्का अध्यक्ष महन्थ ठाकुरसहित चार जनालाई पार्टीबाट निष्कासन गरेको थियो । त्यस्तै ठाकुर पक्षले पनि यादवलाई निष्कासन गरेको थियो ।
दुबै पक्षले एक अर्कालाई कारबाही गरेको जानकारी यसअघि नै आयोगमा बुझाएको थिए । यादवले बहुमत कार्यकारिणीको हस्ताक्षरसहित कारबाहीको पत्र बुझाएका थिए भने ठाकुरले यादवलाई कारबाहीको पत्र मात्रै आयोगमा बुझाएका थिए । आयोगले दुबैको मागलाई अस्वीकार गरेको थियो ।
© 2026 All right reserved to khabarcnter.com | Site By : Sobij
