२०८२ भाद्र २५ गते बुधवार
२०८२ भाद्र २५ गते बुधवार
गोरखा । गोरखामा बाढीले बगाएर बेपत्ता भएका बर्दियाको राजापुर नगरपालिका ७ का ३८ वर्षका गोविन्द चौधरीको शव फेला परेको छ । बुधबार बिहान चौधरीको शव आरुघाटस्थित मान्द्रेथोकको खोलामा ढुङ्गाको चेपुवामा फेला परेको प्रहरीले जनाएको छ ।
मंगलबार बिहान करिब साढे आठ बजे आरुघाट गाउँपालिका २ स्थित ठोटनेरी खोला तर्ने क्रममा चौधरीलाई बाढीले बगाएको थियो। उनी केही समयदेखि गोरखाको आरुघाटमा मजदुर काम गर्नका लागि आएका थिए ।
बाढीपहिरोले १७ घरपरिवार विस्थापित
लगातार तीन दिनदेखि परेको वर्षाका कारण आएको बाढीपहिरोले गोरखामा १७ घरपरिवार विस्थापित भइसकेको छन् ।
जिल्ला प्रहरी कार्यालय गोरखामा हालसम्म प्राप्त जानकारीअनुसार गोरखाका विभिन्न स्थानीय तहका घरपरिवार विस्थापित भएका हुन् ।
प्रहरीका अनुसार हालसम्म धार्चे गाउँपालिकाका १० घर, चुमनुब्री गाउँपालिकाका ४ घर, बारपाक सुलिकोट गाउँपालिकाका २ घर र भिमसेन थापा गाउँपालिकाका १ घरपरिवार विस्थापित भइसकेका छन् ।
चुमनुब्री गाउँपालिका ३ सल्लेरीका विस्थापित चार घरपरिवारका सदस्यहरुलाई सुरक्षित ठाउँमा स्थानान्तरण गरिसकेको गोरखा प्रहरी प्रवक्ता डिएसपी प्रकाश दाहालले जानकारी दिए ।
सडकखण्ड अवरुद्ध
वर्षाका कारण गोरखाको दुई सडकखण्ड अबरुद्ध भएका छन् । मझुवादेखि मनकामना जाने सडक र बाह्रकिलोदेखि बारपाक जाने सडक पहिरोका कारण अवरुद्ध भएको गोरखा प्रहरीले जनाएको छ ।
प्रहरीका अनुसार मझुवादेखि मनकामना सडक खण्ड अन्तरगत शहिद लखन गाउँपालिका वडा नं ३ को नयाँपुलमा मंगलबार बेलुकी करिब ५ बजे खसेको पहिरोका कारण १० मिटर सडक अवरुद्ध भएको छ । त्यहाँको सडक तत्काल सन्चालमा ल्याउनका लागि नयाँ ट्रयाक खोल्नुपर्ने देखिएको डिएसपी प्रकाश दाहालले बताए ।
बाह्रकिलोदेखि बारपाक सडक अन्तरगत बारपाक सुलिकोट गाउँपालिका ४ झोलुङेमा पहिरो खसेपछि सडक अवरुद्ध भएको छ । सो ठाउँमा करीब ९० मिटर सडक बगाएकोले नयाँ ट्रयाक खोल्नुपर्ने अवस्था देखिएको डीएसपी दाहालले बताए ।
© 2025 All right reserved to khabarcnter.com | Site By : Sobij
