२०८३ श्रावण २८ गते बिहिवार
२०८३ श्रावण २८ गते बिहिवार
.gif)
संयुक्त अरब इमिरेट्स (यूएई) को दुबईस्थित इमिरेट्स रोडमा सोमबार भएको एक दुःखद सडक दुर्घटनामा परी सात जना श्रमिकको मृत्यु भएको छ । दुबई प्रहरीका अनुसार मृत्यु हुनेहरूमा विदेशी श्रमिकहरू रहेका छन्, जसमा केही भारतीय नागरिक समेत समावेश छन् ।
दुबई प्रहरीको ट्राफिक विभागका निर्देशक ब्रिगेडियर जुमा सालेम बिन सुवैदानका अनुसार प्राविधिक गडबडीका कारण एउटा ट्रक सडकको बीचमै रोकिएको थियो । सोही क्रममा पछाडिबाट आउँदै गरेको एक मिनीबसले गति नियन्त्रण गर्न नसकी ट्रकलाई ठक्कर दिँदा उक्त भयानक दुर्घटना भएको हो ।
प्रारम्भिक अनुसन्धानका अनुसार मिनीबसका चालकले आवश्यक ध्यान नदिएको र सुरक्षित दूरी कायम नगरेका कारण यो दुर्घटना हुन पुगेको हो ।
यस भीषण दुर्घटनामा परी ९ जना यात्री घाइते भएका छन् । घाइतेहरूमध्ये ५ जनाको अवस्था अत्यन्तै गम्भीर रहेको र ४ जनाको अवस्था मध्यम रहेको प्रहरीले जनाएको छ । दुर्घटनालगत्तै उद्धार टोलीले सबै घाइतेहरूलाई उपचारका लागि स्थानीय अस्पतालमा भर्ना गरेको छ ।
यूएईमा कार्यरत विदेशी श्रमिकहरू अक्सर कार्यस्थल आउन–जानका लागि साझा यातायात (मिनीबस) को प्रयोग गर्ने गर्छन् र सोही क्रममा यो दुर्घटना भएको बताइएको छ । एजेन्सी
© 2026 All right reserved to khabarcnter.com | Site By : Sobij
