२०८२ माघ ८ गते बिहिवार
२०८२ माघ ८ गते बिहिवार
काठमाडौं । पूर्वराष्ट्रपति विद्यादेवी भण्डारी शुक्रबार सर्वोच्च अदालत पुगेकी छन् ।
त्यसक्रममा उनले गत भदौ २३ र २४ गते भएको जेन-जी आन्दोलनका क्रममा जलाइएको अदालतको संरचना पनि अवलोकन गरेकी छन् । उनले अवलोकनका क्रममा क्षतिको विवरण र पुनर्निर्माणको अवस्थबारे पनि कर्मचारी र न्यायाधीशहरूसँग जानकारी लिएकी छन् ।
त्यसक्रममा पूर्वराष्ट्रपति भण्डारी र प्रधानन्यायाधीश प्रकाशमानसिंह राउतबीच एक्ला एक्लै संवादसमेत भएको छ। दुवै पक्षका सचिवालयका सदस्यहरूलाई बाहिर राखेर उनीहरूबीच करिब एक घण्टा लामो संवाद भएको हो ।
उनीहरूबीचको कुराकानीबारे केही बाहिर आएको छैन । यद्यपि पछिल्लो समय नेकपा एमालेका अध्यक्ष केपी शर्मा ओली र नेपाली कांग्रेसले समेत भदौ २७ गते विघटित प्रतिनिधिसभा पुनर्स्थपाना माग गर्दै आएका छन् ।
ओलीले बिहीबार मात्रै एमालेका प्रवास कमिटीका नेताहरूलाई सम्बोधनका क्रममा अन्य बेला विघटित हुँदा दुई महिनामा प्रतिनिधिसभा फर्किएका बताउँदै यस पटकको ढिलाइमा रोष प्रकट गरेका छन् ।
प्रतिनिधिसभा विघटनाविरुद्ध परेका झण्डै २० वटा रिटलाई सर्वोच्चले एकै ठाउँ राखेर सुनुवाइ गर्दैछ । तर फागुन २१ गतेको प्रतिनिधिसभा निर्वाचनका लागि निर्वाचन आयोगमा समानुपातिक उम्मेदवारको नाम दर्ता भइसकेको छ ।
यो अवस्थामा एकथरीले देश निर्वाचनमा गएको बताइरहेका छन् । एमालेसहित अर्काथरी भने पहिले संविधानविपरीतको विघटना सच्याएर मात्रै निर्वाचनमा जानुपर्ने अडानमा छन् ।
© 2026 All right reserved to khabarcnter.com | Site By : Sobij
