२०८२ मंसिर १३ गते शनिवार
२०८२ मंसिर १३ गते शनिवार
काठमाडौं । नेपाल प्रिमियर लिग (एनपीएल)को दोस्रो संस्करणको १८ औँ खेलमा जनकपुर बोल्ट्सलाई ६ विकेटले पराजित गर्दै सुदूरपश्चिम रोयल्सले प्रतियोगितामा पाँचौं जित दर्ता गरेको छ।
त्रिवि क्रिकेट मैदानमा जनकपुर बोल्ट्सले दिएको १४६ रनको मध्यम लक्ष्य पछ्याएको सुदूरपश्चिम रोयल्सले १७.४ ओभरमा ४ विकेट गुमाउँदै १४८ रनसहित लक्ष्य पूरा गरेको हो।
सुदूरपश्चिमका लागि इशान पाण्डेले ५६ रनको अर्धशतकीय पारी खेले। उनले ३५ बलमा ८ चौका र १ छक्का प्रहार गरे। उनले तेस्रो विकेटको लागि विनोद भण्डारीसँग ९२ रनको साझेदारी गरे। सुरुवाती २ विकेट सस्तैमा गुमाएको सुदूरपश्चिम रोयल्सका लागि विनोद भण्डारी र इशान पाण्डेको साझेदारीले जितको नजिक पुर्यायाे।
विनोद भण्डारीले ४२ रन बनाए। हर्मित सिंह २५ र कप्तान दीपेन्द्र सिंह ऐरी १० रनमा अविजित रहे। जनकपुरका लागि माज सदाकले २ र सञ्जय कृष्णमुर्थीले १ विकेट लिए।
त्रिवि क्रिकेट मैदानमा टस जितेर ब्याटिङ गरेको जनकपुरले निर्धारित २० ओभरमा ८ विकेट गुमाउँदै १४५ रन बनाएको छ। जनकपुरका लागि सञ्जय कृष्णमुर्थीले सर्वाधिक ५० रन बनाए। उनले ३८ब लमा ४ चौका र २ छक्का प्रहार गरे। उनले पाँचौं विकेटको लागि ५५ रनको साझेदारी गर्दै टिमको स्कोर बोर्ड उकासेका थिए।
ओपनर माज सदाकले १२ रन बनाए। अर्का ओपनर आसिफ शेख डकआउट भए। मयन यादव ६ रनमा पेभेलियन फर्किए। निकोल लोफ्टी इटोनले ३९ रन बनाए। आदित्य महताले १५ रन बनाउँदा शुभ कंसाकर डक आउट भए।
वायन पर्नेल १४ रन बनाउँदै अन्तिम बलमा क्याच भए। रुपेश सिंह १ रनमा अविजित रहे। सुदूरपश्चिम रोयल्सका लागि अभिनास बोहोराले सर्वाधिक ४ विकेट लिए। स्क्ट केगुइलिनले ३ विकेट लिँदा दीपेन्द्र सिंह ऐरीले १ विकेट लिए। लगातारको पाँच जित पछि सुदूरपश्चिम रोयल्सको प्लेअफ लगभग पक्का भएको छ।
सुदूरपश्चिमले ४ खेलमा ४ जितसहित अंक तालिकाको शीर्ष स्थानमा रहेको छ। सुदूरपश्चिम रोयल्सले पहिलो खेलमा काठमान्डु गोर्खाजलाई २९ रनले हराएको थियो। दोस्रो खेलमा पोखरा एभेन्जर्सलाई १८ रन, तेस्रो खेलमा कर्णाली याक्सविरुद्ध ४५ रन र चौथो खेलमा लुम्बिनी लायन्सलाई ७ विकेटले हराएको थियो।
जनकपुरले यसअघि कुनैपनि खेल जितेको छैन। पहिलो खेलमा काठमान्डु गोर्खाजसँग ५ विकेटले हारेको जनकपुरले दोस्रो खेलमा विराटनगरसँग ९ र तेस्रो खेलमा पोखरा एभेन्जर्ससाग २५ रनले हार बेहोरेको थियो।
© 2025 All right reserved to khabarcnter.com | Site By : Sobij
