२०८२ आश्विन २७ गते सोमवार
२०८२ आश्विन २७ गते सोमवार
स्याङ्जा । स्याङ्जाको एकै गाउँका १९ जनामा कोरोना संङ्क्रमण पुष्टि भएपछि गाउँ नै सिल गरिएको छ ।
वालिङ-१, धरमपानीका स्थानीयवासीमा कोरोनाको लक्षण देखिएपछि वालिङस्थित प्राथमिक अस्पताल र स्वास्थ्यकर्मीको टोलीले गाउँमै पुगेर स्वास्थ्य परीक्षण गरेका थिए ।
गत १४ गते गाउँमा चौरासी पूजाको आयोजना गरिएको र पूजामा केही सहभागीलाई लक्षण देखिएपछि उनीहरु एन्टिजिन परीक्षण गर्न प्राथमिक अस्पताल आएका थिए ।‘सात जनाको एन्टिजिन परीक्षणमा सातै जनालाई कोरोना पोजेटिभ देखिएपछि धरमपानी गाउँमै गएर परीक्षण गर्यौँ । २५ जनाको नमुना परीक्षण गर्दा १९ जना संक्रमित भेट्यौँ । अहिले गाउँनै सिल गरेका छौँ ’,नगरप्रमुख दिलिप खाँणले भन्नुभयो ।
उक्त गाउँमा ९ वर्षका बालकदेखि ७७ वर्षकी ज्येष्ठ महिलासम्म संक्रमित रहेको स्वास्थ्य शाखा प्रमुख एवं जनस्वास्थ्य निरिक्षक कमलप्रसाद पाण्डेले बताउनुभयो । सङ्क्रमण हुनेमा महिला १४ जना र पुरुष ५ जना रहेका छन् ।
गाउँमै पुगेर आवश्यक औषधिहरु वितरण गरिएको र समस्या परेको खण्डमा जुनसुकै समयमा पनि स्वास्थ्यकर्मीहरु तयारी अवस्थामा रहेका पाण्डेले बताउनुभयो । वालिङ स्थित प्राथमिक अस्पतालमा ६ बेडमा अक्सिजनसहितको आइसोलेशन कक्ष संचालनमा ल्याइएको छ ।
कोरोनाको हब बन्दै गएको वालिङ नगरभित्र बुधबार मात्रै ३५ जना नयाँ संक्रमित थपिएका छन् । हालसम्म वालिङमा मात्रै २०८ जना सक्रिय संक्रमित छन् भने जिल्लाभर ३३१ रहेका छन् ।
© 2025 All right reserved to khabarcnter.com | Site By : Sobij
