२०८२ आश्विन २६ गते आइतवार
२०८२ आश्विन २६ गते आइतवार
कुवेतमा विषाक्त मदिरा सेवनका कारण थप दुईजना नेपालीको मृत्यु भएको छ । यससँगै पछिल्लो चार दिनमा मृत्यु हुने नेपाली कामदारको संख्या ११ पुगेको छ । मंगलबार मदिरा सेवनबाट बिरामी परेकामध्ये ४० नेपाली अझै उपचाररत छन् । तीमध्ये १५ जना आइसियूमा छन् ।
कुवेतस्थित नेपाली राजदूतावासका श्रमसहचारी गिरीप्रसाद आचार्यले थप दुईजना नेपालीको मृत्यु भएको जानकारी आएको र मृतकका परिवारसँग सम्पर्क भइरहेको बताए । ‘मृतकको मेडिकल रिपोर्ट आउने क्रममा छ, कतिपयको प्राप्त भएको छ । प्राप्त भएजतिको मेडिकल रिपोर्टका आधारमा परिवारसँग सम्पर्क गरिरहेका छौँ । कतिपय परिवार आफैँले पनि सम्पर्क गर्नुभएको छ,’ आचार्यले कुवेतबाट टेलिफोनमा भने ।
आचार्यले कुवेतका विभिन्न अस्पतालमा उपचाररत ४० मध्ये १५ जनाको आइसियूमा उपचार भइरहेको बताए । ‘नेपालीहरू अस्पतालमा जाने र डिस्चार्ज हुने क्रम जारी नै छ । हाल अस्पतालमा ४० जना उपचाररत हुनुहुन्छ भन्ने जानकारी प्राप्त गरेका छौँ,’ आचार्यले भने ।
यसअघि कुवेतको स्वास्थ्य मन्त्रालयले मदिरा सेवनबाट एसियाली मूलका कम्तीमा २३ जनाको मृत्यु भएको र १६० जना अस्पतालमा भर्ना भएको सार्वजनिक गरेको थियो । कतिपयको किड्नीमा गम्भीर समस्या देखिएको छ । अति प्रज्वलनशील मेथानोल मिसिएको मदिरा सेवनबाट नेपालीको मृत्यु भएको कुवेतका सरकारी अधिकारीले नेपाली राजदूतावासलाई जानकारी दिएका छन् ।
कुवेतमा मदिरा प्रतिबन्धित छ । मदिरा बेच्ने र सेवन गर्ने दुवैमाथि कानुनी कारबाही हुँदै आएको छ । नेपाली राजदूतावासले मदिरा सेवन नगर्न नेपाली कामदारका नाममा सूचना जारी गर्दै आएको छ । कुवेतमा एक लाख ६० हजारभन्दा बढी नेपाली छन् ।
© 2025 All right reserved to khabarcnter.com | Site By : Sobij
