२०८२ भाद्र १५ गते आइतवार
२०८२ भाद्र १५ गते आइतवार
काठमाडौं । माल्टामा कारले ठक्कर दिएर ४२ वर्षीय नेपालीको मृत्यु भएको छ । म्याग्दी स्थायी ठेगाना भएका ४२ वर्षीय खिमबहादुर पुनको दुर्घटनामा मृत्यु भएको हो ।
आइतबार बिहान बिरकिरकारा भन्ने स्थानमा उक्त दुर्घटना भएको गैरआवासीय नेपाली संघ माल्टाका अध्यक्ष रेम्स खनालले जानकारी दिएका छन् ।
उनको परिवार पोखरामा बस्दै आएको खुलेको छ भने परिवारलाई जानकारी गराइसकिएको खनालले जानकारी दिए । स्थानीय सञ्चारमाध्यम माल्टा टाइम्सका अनुसार ‘हिट–एण्ड–रन’ को घटना भएको हो । मोटरसाइकलमा सवार पुनलाई एउटा कारले ठक्कर दिएर भागेको थियो ।
प्रारम्भिक अनुसन्धान अनुसार स्थानीय समय बिहान करिब ५ः२० बजे त्रिक साल्भु पसाइला सडकमा कारले पुनले चलाएको मोटरसाइकललाई ठक्कर दिएको थियो । ठक्करपछि कार पार्किङमा राखिएका अरु तीनवटा गाडीमा ठोक्किएको बताइएको छ।
दुर्घटनापछि कार चालक र दुई जना सवारहरू घटनास्थलबाट फरार भएका थिए। पीडितको घटनास्थलमै मृत्यु भएको स्थानीय प्रहरीले जानकारी दिएको छ ।
घटनाको केही मिनेटपछि भेटिएकी १८ वर्षीया मोस्टा निवासी युवतीलाई प्रहरीले नियन्त्रणमा लिएको छ भने उनलाई केही चोटपटक लागेको कारण माटर डेई अस्पताल लगिएको भए पनि स्वास्थ्य अवस्थाबारे जानकारी खुलाइएको छैन।
उक्त घटनाका चालक र अर्को सवारको खोजी कार्य जारी रहेको प्रहरीले जनाएको छ। यस्तै हाल मृतकको शव मातर–देई हस्पिटलमा राखिएको छ ।
© 2025 All right reserved to khabarcnter.com | Site By : Sobij
