२०८२ भाद्र १४ गते शनिवार
२०८२ भाद्र १४ गते शनिवार
काठमाडौं । संयुक्त अरब इमिरेट्स (यूएई)को दुबईमा तय भएको गायक कुमा सागरको लाइभ प्रस्तुतिका लागि टिकट बिक्री अन्तिम चरणमा पुगेको छ । करिब ३ हजार टिकट बिक्री गर्ने लक्ष्य भएकोमा अधिकांश बिक्री भइसकेको कार्यक्रम संयोजक भीम मल्ल ठकुरीले बताए ।
उनले अब सीमित टिकट बाँकी रहेको भन्दै आफ्नो टिकट सुरक्षित गर्न यूएईमा रहेका नेपाली समुदायलाई आग्रह गरे ।
गैरआवासीय नेपाली संघ (एनआरएनए) यूएईका उपाध्यक्ष समेत रहेका ठकुरीको संयोजकत्व र अनिल गुरुङको उपसंयोजनमा कुमा सागरको प्रस्तुति हुन लागेको हो ।
कार्यक्रममा नर्मल टिकटका साथै भीआईपीसमेत गरी दुईथरी टिकटको व्यवस्था गरिएको छ । ‘हामीले कार्यक्रम सफल बनाउन सबै तयारी गरिरहेका छौँ यहाँ परिवार भएकाले भीआईपी टिकट लिएर छुट्टै मनोरञ्जन गर्न पाउनुहुन्छ’, उनले भने ।
आगामी जुलाई २० तारिख (साउन ४ गते)का दिन दुबईमा पहिलो पटक गायक कुमा सागर र लोकप्रिय ख्वप ब्यान्डको बृहत् साङ्गीतिक कार्यक्रम आयोजना हुन लागेको हो ।
नेपाली समुदायको साङ्गीतिक स्वादलाई मध्यनजर गर्दै तेस्रो संस्करणको गोर्खा साँझ अन्तर्गत यो कार्यक्रमको आयोजना गर्न लागिएको ठकुरीको भनाइ छ । कार्यक्रमले प्रवासमा रहेका नेपालीहरूलाई लाइभ नेपाली संगीतको प्यास मेटाउने अपेक्षा गरिएको छ।
दुबईस्थित अल नासर क्लबमा आयोजना हुने कार्यक्रम दिउँसो २ बजेदेखि बेलुकी ८ बजेसम्म चल्ने छ भने कार्यक्रममा नेपाली साङ्गीतिक रंग, मेलोडी र देशप्रेमको सम्मिश्रण रहने ठकुरीको भनाइ छ।
कार्यक्रमको प्रवेश साधारणतर्फ शुल्क ५० दिराम तोकिएको छ, जहाँ दर्शकहरूले लाइभ साङ्गीतिक अनुभव लिन पाउनेछन्।
गायक कुमार सागर आफ्ना ‘देशप्रेमी’ तथा ‘प्यासनल’ गीतहरूका लागि परिचित छन् भने ख्वप ब्यान्डले पछिल्लो दशकमा नेपालको मौलिकता झल्काउने संगीतमार्फत छुट्टै पहिचान बनाइसकेको छ। दुबईमा उनीहरू दुवै पहिलो पटक एकै मञ्चमा देखिन लागेकोले कार्यक्रम थप रोमाञ्चक हुने विश्वास गरिएको छ।
गोरखा साँझले यसअघि पनि युएईमा विभिन्न सांस्कृतिक कार्यक्रमहरू आयोजना गर्दै आइरहेको छ। आयोजक ठकुरीले भने, ‘यो केवल कन्सर्ट होइन, हाम्रो पहिचान, भावना र एकता प्रदर्शन गर्ने अवसर हो ।’
कार्यक्रमको टाइटल स्पोन्सर माउन्ट एभरेस्ट सुपरमार्केट रहेको छ भने अन्य सहयोगी संस्थाहरूले पनि कार्यक्रमलाई भव्य बनाउन साथ दिने क्रम जारी रहेको ठकुरीले बताए ।
© 2025 All right reserved to khabarcnter.com | Site By : Sobij
