इजरायलले इरानमाथि हमला गर्न दुई सय वटा लडाकु विमान प्रयोग गरेको बताएको छ।
इजरायल डिफेन्स फोर्स (आइडिएफ) प्रवक्ता ब्रिगेडियर जनरल एफी डेफ्रिनले इरानमा हमला गर्न २०० लडाकु विमान प्रयोग गरिएको बताएका हुन्। हवाइ हमलामा अरू हतियार पनि प्रयोग गरिएको उनले बताएका छन्।
विभिन्न झन्डै ३३० हतियार प्रयोग भएका छन्। लडाकू विमानका पाइलटहरूले इरानी आणविक भट्टीहरूमा आक्रमण जारी राखेका छन्, पत्रकारहरूलाई ब्रिफिङ गर्दै प्रवक्ता डेफ्रिनले भनेका छन्।
इसराइलले शुक्रबार बिहान ३:३७ बजेदेखि इरानमा आक्रमण गरेको थियो। राजधानी तेहरानमा विस्फोटका ठूलो आवाजले मानिसहरू ब्युँझिएका थिए। आइडिएफ प्रवक्ता डेफ्रिनले इरानका सयभन्दा बढी लक्ष्यहरूमा निशाना बनाइएको बताएका छन्।
इजरायलले आणविक भट्टी, ब्यालिस्टिक मिसाइल कारखाना र अन्य हतियार कारखानामा प्रहरा गरिएको भनेको छ।
तस्बिर र भिडिओहरूमा नतान्जमा रहको इरानको मुख्यमध्येको आणविक भट्टी इसराइली हमलाबाट जलिरहेको देखिन्छ।
उक्त आणविक भट्टी राजधानी तेहरानबाट २२० किलोमिटर दक्षिणपूर्वमा छ। इजरायलले त्यस्ता कैयौं भट्टीहरूमा लक्ष्य गरेर आक्रमण गरेको छ। उसले हतियार निर्माणस्थललाई मात्रै होइन सैन्य अधिकारी र आणविक हतियार बनाउने वैज्ञानिकहरूलाई पनि निशाना बनाएको छ।
इरानको शक्तिशाली सैन्य संगठन इस्लामिक रिभोलुसन गार्ड (आइआरजिसी) का प्रमुख जनरल हुसेन सलामीलाई इजरायलले आइआरजिसी हेडक्वार्टरमै आक्रमण गरेर मारेको छ।
त्यस्तै सर्वोच्च नेता आयातोल्लाह अल खामेनी पछिको शक्तिशाली मानिएका इरानी सेनाका प्रमुख मेजर जनरल मोहम्मद बघेरीको पनि मृत्यु भएको बताइएको छ। इरानी सेनाकै उपप्रमुख जनरल घोलमली रसिद पनि मारिएका छन्।
आणविक हतियार बनाउने वैज्ञानिकहरू पनि मारिएको अमेरिकी पत्रिका न्युयोर्क टाइम्सले जनाएको छ। इरानको आणविक ऊर्जा संगठनका पूर्वप्रमुख फेरेडोन अब्बासी र तेहरानस्थित इस्लामिक आजाद विश्वविद्यालयका अध्यक्ष तथा सैद्धान्तिक भौतिकशास्त्री मोहम्मद मेहदी तेहरानची पनि मारिएको बताइएको छ।
संयुक्त राष्ट्रसंघका महासचिव एन्टोनियो गुटरेसले हमलाको निन्दा गरेको छ। ओमान, साउदी अरब लगायतका देशहरूले पनि घटनाको निन्दा गरेका छन्। एसियाली र युरोपेली मुलुकहरूले दुवै देशलाई संयम अपनाउन भनेको छ।
इरानी सर्वोच्च नेता खामेनीले इसराइललाई कडा जबाफ दिने बताएका छन्। यो अपराधका साथ यहूदी शासकले आफूलाई तीतो र पीडादायी भाग्यको लागि तयार पारेको छ र उसले यसको परिणाम भोग्ने निश्चित छ, खामेनीले भनेका छन्।
इरानमा आक्रमण गरेपछि इसराइलले देशभरि आपतकाल घोषणा गरेको छ। इजरायलले इरानको सम्भावित जबाफको पूर्वतयारीस्वरूप देशव्यापी आपतकाल घोषणा गरेको हो। विद्यालय बन्ददेखि अस्पतालमा समेत बहिरंगबाहेकका सेवा बन्द गर्न निर्देशन दिइएको अन्तर्राष्ट्रिय सञ्चारमाध्यमहरूले जनाएका छन्।
मानिसहरूलाई अत्यावश्यक कामबाहेक घरबाहिर ननिस्कन भनिएको छ भने भेला गर्न पनि रोक लगाइएको छ। साथै सेनालाई पनि तयार रहन भनिएको छ। इजरायल प्रधानमन्त्री बेन्जामिन नेतन्याहूले इजरायलमाथि सुरक्षा चुनौती देखिएका कारण हमला गरिएको भनेका छन्।
उनले इरानी आणविक भट्टी र हतियार कारखाना नष्ट नपारून्जेल आक्रमण जारी रहने पनि बताएका छन्। इरानमा आक्रमण गर्नुअघि प्रधानमन्त्री नेतन्याहूले आफ्नो मुख्य सहयोगी अमेरिकासँग परामर्श गरेका थिए।
अमेरिकालाई जानकारी गराएपछि इजरायलले इरानी आणविक भट्टी, हतियार कारखाना, आणविक हतियार उत्पादनमा खटिएका वैज्ञानिक र सैनिक उच्च अधिकारीहरूलाई लक्ष्य गरेर आक्रमण गरेको हो।
