२०८२ भाद्र १४ गते शनिवार
२०८२ भाद्र १४ गते शनिवार
काठमाडौं । उत्तर प्रदेशको मुजफ्फरनगरबाट एउटा अचम्मको घटना बाहिर आएको छ । यहाँको एक बस्तीमा एक नवविवाहित युवती हनिमुनबाट फर्किएर घरमा प्रवेश नपाएपछि ससुरा घरबाहिर धर्नामा बसेकी छन् ।
भारतीय मिडिया रिपोर्टका अनुसार बुढाना निवासी शालिनी शंकरको १२ फेब्रअरीमा विवाह भएको थियो । विवाहपछि उनी श्रीमान्सँग हनिमुनका लागि इन्डोनेसियाको बाली आइल्याण्ड गएकी थिइन् र त्यहाँबाट आएपछि आफ्नो माइती गएकी थिइन् । तर इन्डोनेसियाबाट फर्किनेबित्तिकै पतिको व्यवहारमा परिवर्तन आएको उनको बुझाइ छ ।
माइतीबाट ससुरा घर पुग्दा शालिनीलाई घरभित्र पस्न दिइएन । यसपछि ससुरा घरको व्यवहारबाट त्रसित नवविवाहित युवतीले माइती परिवारसहित पाल टाँगेर हड्तालमा बसेकी हुन् ।
नवविवाहित युवती हड्तालमा बसेको १२ घण्टाभन्दा बढी भइसकेको छ । विवाहित महिलालाई भेट्न प्रहरी पनि पुगेको थियो तर ससुराले घरको गेट नखोलेकाले कुनै समाधान हुन नसकेको भारतीय सञ्चारमाध्यमले जनाएका छन् ।
शालिनीको ससुराले ५० लाख दाइजो मागेका थिए । पैसा नदिएसम्म घरभित्र पस्न नदिने बताएको समाचारमा उल्लेख छ ।
प्रहरीले पीडित पक्षलाई कुनै समस्या भए लिखित उजुरी दिन भनेको छ । लिखित उजुरी दिए घटनाको अनुसन्धान गरी कारबाही गर्ने प्रहरीले जनाएको छ ।
यसैबीच, शालिनीले परिवारसहित आत्महत्या गर्ने धम्की दिएकी छन् । शालिनीले भोलिसम्म घरभित्र पस्न नसके परिवारसहित आत्महत्या गर्ने बताएकी छन् ।
© 2025 All right reserved to khabarcnter.com | Site By : Sobij
