२०८२ आश्विन २७ गते सोमवार
२०८२ आश्विन २७ गते सोमवार
काठमाडौं । भारतको इन्दिरा गान्धी अन्तर्राष्ट्रिय विमानस्थलको टर्मिनल ३ को प्रतिबन्धित क्षेत्रमा एक किशोरलाई घुमिरहेको देखेपछि सोधपुछ गर्दा सार्वजनिक भएको तथ्यले सबैलाई अचम्मित बनाएको छ ।
ती बालक अफगानिस्तानबाट विमानको पांग्रामा लुकेर भारत आएका थिए । १३ वर्षीय ती बालक ३० हजार फिटको उचाइमा ९४ मिनेटसम्म जीवित रहेको पाइएको हिन्दुस्तान टाइम्सले जनाएको छ ।
ती अफगानी बालकले इरान भाग्ने योजना बनाएका थिए । तर, गलत विमानमा चढे र सिधै दिल्ली आइपुगे ।
उनी काबुलबाट केएएम एयरको फ्लाइट आरक्यू ४४०१ मार्फत दिल्ली आएका थिए । त्यो विकानको उडान समय करिब ९४ मिनेट थियो ।
सबैभन्दा आश्चर्यको कुरा के हो भने उनी पूरै यात्राका क्रममा विमानको पछाडिको पांग्राको माथिल्लो भागमा बसेका थिए । त्यो त्यस्तो स्थानमा जहाँ अक्सिजनको धेरै कमी हुन्छ । र, तापक्रम माइनस ६० डिग्री सेल्सियससम्म झर्छ ।
बालकले आफू काबुल एयरपोर्टमा यात्रुको पछिपछि गाडीमार्फत प्रवेश गरेको र त्यसपछि रनवेमा विमाननजिक पुगेर ह्वील वेलमा लुकेको बताएका छन् । उनी नाबालिग भएकाले कानुनी कारबाही हुँदैन । तर, यो घटनापछि काबुल एयरपोर्टको सुरक्षामाथि गम्भीर प्रश्न गरिएको छ ।
विज्ञले उनी जीवित रहनु कुनै चमत्कारभन्दा कम नरहेको बताएका छन् । एक उड्डयनविज्ञ क्याप्टेन मोहन रंगनाथनका अनुसार, यस्तो यात्रा लगभग असम्भव हुन्छ । उनले भने, “टेक–अफपछि पांग्रा भित्र सर्छ र ढोका बन्द हुन्छ, जसले गर्दा ह्वील वेलमा सीमित चाप र तापक्रम बन्न सक्छ । तर, यस उचाइमा जीवित रहनु अत्यन्तै कठिन हुन्छ ।”
१० हजार फिटभन्दा माथि अक्सिजनको स्तर धेरै कम हुन्छ र मानिस केही मिनेटमै बेहोस हुने चिकित्सकको भनाइ छ । तापक्रम माइनस ५० डिग्री सेल्सियस पुगे शरीरमा गम्भीर हाइपोथर्मिया हुनसक्छ । यस्तो अवस्थामा जीवित रहने सम्भावना केवल २० प्रतिशत मात्र हुने चिकित्सकको भनाइ छ ।
भारतमा यसप्रकारको यो दोस्रो घटना हो । सन् १९९६ मा दिल्लीका दुई युवक ब्रिटिस एयरवेज फ्लाइटको ह्वील वेलमा लुकेर लन्डन पुगेका थिए । उक्त घटनामा एकजनाको मृत्यु भएको थियो । अर्को युवक बाँच्न सफल भएका थिए ।
© 2025 All right reserved to khabarcnter.com | Site By : Sobij
