२०८२ भाद्र १ गते आइतवार
२०८२ भाद्र १ गते आइतवार
चालू आर्थिक वर्षको दुई महिनामा पाँच वाणिज्य बैंकहरु नाफाका आधारमा अर्बमाथि उक्लिएका छन्। भदौ महिनासम्म २० वाणिज्य बैंकहरुले १७ अर्ब ६९ करोड नाफा कमाउँदा ५ वाणिज्य बैंकले मात्रै अर्बमाथिको नाफा गरेका हुन्।
नेपाल राष्ट्र बैंकका अनुसार सबैभन्दा धेरै नाफा कमाउनेमा नबिल, ग्लोबल आईएमई, नेपाल इन्भेष्टमेन्ट मेगा, हिमालयन र कुमारी बैंक छन्। यी पाँचवटै बैंकको नाफा दुई महिनामै अर्बमा उक्लिएको छ।
गत साउनमा ८९ करोड रुपैयाँसहित नाफा कमाउनेमा पहिलो नम्बरमा आएको ग्लोबल आईएमई बैंक भदौ महिनामा भने १ अर्ब ५६ करोड रुपैयाँसहित दोस्रो नम्बरमा झरेको छ। पहिलोमा नबिल बैंक उक्लिएको हो।
साउनमा ८० करोड नाफा कमाएर दोस्रोमा रहेको नबिल बैंकले भदौमा ग्लोबल आईएमईलाई जित्दै १ अर्ब ६६ करोड नाफासहित धेरै नाफा कमाउनेको पहिलो नम्बरमा आएको हो।
यस्तै नाफा धेरै कमाउनेको तेस्रो नम्बरमा १ अर्ब ४१ करोड रुपैयाँसहित नेपाल इन्भेष्टमेन्ट मेगा बैंक आउँदा चौथो नम्बरमा १ अर्ब १६ करोड नाफासहित हिमालयन बैंक आएको छ। कुमारी बैंक भने १ अर्ब ८ करोड रुपैयाँसहित सर्वाधिक नाफा कमाउने बैंकहरुको पाँचौँ स्थानमा छ।
यीबाहेक अन्य दुई बैंकहरु पनि अर्बमा उक्लिने होडमा देखिएका छन्। प्राइम बैंक र प्रभु बैंक थोरै रकमसहित अर्ब नाफा गर्ने क्लबमा उक्लिन सकेनन्। यी बैंकहरुले भदौ महिनामा क्रमशः ९७ करोड र ९१ करोड रुपैयाँ नाफा कमाएका हुन्। गत साउनमा यी दुवै बैंकले क्रमशः ५० करोड र ५३ करोड रुपैयाँको नाफा गरेका थिए।
यीबाहेकका बैंकहरुले पनि भदौ महिनाको नाफामा उल्लेख्य सुधार गरेका छन्। जसमा राष्ट्रिय वाणिज्य बैंक र कृषि विकास बैंकले ८८ करोड रुपैयाँको नाफा कमाउँदा लक्ष्मी सनराइज बैंकले ८६ करोड र एभरेष्ट बैंकले ८२ करोड नाफा कमाएका छन्।
यस्तै भदौ महिनामा एनएमबी बैंकले ७८ करोड नाफा कमाउँदा सानिमा बैंकले भने ६८ करोड, नेपाल बैंकले ६७ करोड, स्ट्यान्डर्ड चार्टर्ड बैंक र सिद्धार्थ बैंकले ६० करोड, सिटिजन्स बैंकले ५८ करोड र नेपाल एसबीआई बैंकले ५३ करोड रुपैयाँ नाफा कमाएका हुन्।
© 2025 All right reserved to khabarcnter.com | Site By : Sobij
