२०८२ भाद्र ११ गते बुधवार
२०८२ भाद्र ११ गते बुधवार
काठमाडौं । गत आर्थिक वर्ष २०८०/०८१ मा वाणिज्य बैंकहरूले ६४ अर्ब १५ करोड रुपियाँभन्दा बढी खुद नाफा कमाएका छन् । बैंकहरूले सार्वजनिक गरेको गत आवको चौथो त्रैमाससम्मको वित्तीय विवरणअनुसार सो नाफा कमाएको देखिएको हो ।
बैंकहरुको यो नाफा अघिल्लो आव २०७९/८० को सोही अवधिको तुलनामा १३.४० प्रतिशतले बढी हो । अघिल्लो आवमा बैंकहरुले ५६ अर्ब ५७ करोड ४४ लाख रुपैयाँ खुद नाफा कमाएका थिए ।
गत आवमा सबैभन्दा बढी नाफा कमाउने बैंक नबिल बनेको छ । समीक्षा अवधिमा बैंकले ७ अर्ब ६ करोड रुपैयाँ खुद नाफा कमाएको छ ।
यस अवधिमा सर्वाधिक नाफा वृद्धि भने प्रभु बैंकको देखिएको छ । बैंकको नाफा गत आवको चौथो त्रैमाससम्म १४९९.०४ प्रतिशत वृद्धि भएको छ । साथै, कुमारी बैंकको खुद नाफा ३४५.६७ प्रतिशत, प्राइम कमर्सियल बैंकको २६७.१९ प्रतिशत र कृषि विकास बैंकको १७६.२३ प्रतिशतले बढेको छ ।
समीक्षा अवधिमा १० वाणिज्य बैंकको खुद नाफा भने घटेको छ । नाफा घट्ने बैंकहरूमा एनआईसी एशिया बैंकको सर्वाधिक ६८.९१ प्रतिशतले घटेको छ । त्यस्तै, नेपाल बैंकको ५१.८० प्रतिशत र सिटिजन्स बैंकको खुद नाफा करिब २८ प्रतिशतले घटेको छ ।
सबैभन्दा कम नाफा कमाउने बैंक माछापुच्छ्रे बैंक रहेको छ । यस बैंकले आफ्नो चौथो त्रैमासिकसम्म कुल १ अर्ब २५ करोड १ लाख ६७ हजार रुपैयाँ खुद नाफा कमाएको छ ।
सिटिजन्स बैंक र एनआईसी एशिया बैंकको नाफा डेढ अर्बभन्दा कम छ भने नेपाल बैंकले १ अर्ब ६५ करोड नाफा कमाएको छ।
© 2025 All right reserved to khabarcnter.com | Site By : Sobij
