२०८२ मंसिर १४ गते आइतवार
२०८२ मंसिर १४ गते आइतवार
काठमाडौँ । दशैंमा घर जाने यात्रुका लागि आज (सोमबार)देखि अग्रिम टिकट बुकिङ सुरु भएको छ। काठमाडौँसहित देशका विभिन्न ठाउँमा लामो दूरीका यात्रुका लागि अग्रिम टिकट बुकिङ खुला भएको भौतिक पूर्वाधार तथा यातायात मन्त्रालयले जानकारी दिएको छ।
शुक्रबार भौतिक पूर्वाधार तथा यातायातमन्त्री प्रकाश ज्वाला, यातायात व्यवस्था विभागका महानिर्देशक उद्धवप्रसाद रिजाल र यातायात व्यावसायीबीच २२ असोजदेखि चार्डपर्व लक्षित टिकट बुकिङ खोल्ने सहमति भएको थियो।
हरेक वर्ष दशैं, तिहार र छठ जस्ता पर्वलाई लक्षित गरी लामो दूरीका यात्रुका लागि अग्रिम टिकट बुकिङ खुलाउने गरिन्छ। विशेष गरी संघीय राजधानी काठमाडौंबाट आ–आफ्नो घर फर्किने यात्रुले अग्रिम टिकट लिने गर्छन्।
हरेक वर्ष दशैं, तिहार तथा छठ पर्वका लागि राजधानी काठमाडौंबाट १० लाख यात्रु बाहिरिने गरेका छन्। एकैपटक यात्रुको चाप बढ्ने भएकाले व्यवस्थापनका लागि दशैंअघि अग्रिम टिकट बुकिङ खोल्ने गरिएको छ।
यातायात व्यवसायीहरुले सुरुमा वर्षाका कारण बिग्रिएका सडकको मर्मत गर्नुपर्ने र गाडी भाडा समायोजन (वृद्धि) गरिनुपर्ने माग राख्दै अग्रिम टिकट बुकिङ खोल्न आनाकानी गरिरहेका थिए। सरकारले चाडपर्वको मुखमा भाडा वृद्धि गर्न नसकिने भन्दै व्यवसायीको माग अस्वीकार गरेको थियो।
वर्षाका कारण बिग्रिएका सडकहरुको भने असोजको पहिलो सातादेखि नै मर्मत सुरु गरिएको सरकारले जनाएको छ। सरकारले सडकहरुलाई ३ प्रकारमा वर्गीकरण गरेर मर्मत सुरु गरिएको जनाएको छ। मुख्य राजमार्ग, सहायक राजमार्ग र ग्रामिण सडकहरुलाई प्राथमिकता तोकेर मर्मत थालिएको भौतिक पूर्वाधार तथा यातायात मन्त्रालयले जनाएको छ।
© 2025 All right reserved to khabarcnter.com | Site By : Sobij
