काठमाडौँ । आठौँ नेपाल बिल्डकन अन्तर्राष्ट्रिय प्रदर्शनी तथा नेपाल हाउजिङ्ग एन्ड इन्भेस्टमेन्ट एक्स्पो, नेपाल हेवी इक्युपमेन्ट एन्ड कन्सट्रकसन एक्स्पो भोलिदेखि सुरु हुने भएको छ । 

मिडिया स्पेस सोलुसन्स प्रा.लि.र फ्युचरेक्स ट्रेड फेयर एण्ड इभेन्टस् प्रा.लि.को संयुक्त आयोजनामा भृकुटीमण्डपमा हुने उक्त एक्स्पोको उद्घाटन शहरी विकासमन्त्री विक्रम पाण्डेले गर्नेछन् ।  फागुन ११ गतेदेखि १४ गतेसम्म हुने उक्त एक्स्पोमा विभिन्न देशका ३०० भन्दा बढी ख्यातीप्राप्त ब्राण्डहरूका २०० भन्दा बढी स्टल रहनेछन् ।

प्रदर्शनीमा नेपाल निर्माण व्यवसायी महासंघ, नेपाल चेम्बर अफ कमर्स, नेपाल हेभी इक्विपमेन्ट व्यवसायी महासंघ तथा नेपाल क्रसर तथा खानी उद्योग महासंघ सहयोगी संस्था छन् । 

निर्माण कम्पनी, डिलर, सबडिलर र बिक्रेताहरूले निर्माण ब्यवसायसँग सम्बन्धित उत्पादनहरूको बारेमा जानकारी गराउने र यस क्षेत्रमा आउने नयाँ–नयाँ प्रविधिको बारेमा जानकारी गराउनको लागि सो प्रदर्शनी ७ वर्षदेखि कोसेढुङ्गा सावित भएको आयोजकले बताएका छन् । 

सो अन्तर्राष्ट्रिय प्रदर्शनीमा निर्माण सामग्री, निर्माण मेसिनरी, निर्माण उपकरण, आवास कम्पनीहरू, अपार्टमेन्ट कम्पनीहरू, प्रि–फ्याब संरचनाहरू, युपीभीसी झ्याल ढोका उत्पादन गर्ने मेसिनरी, युपीभीसी प्रोफाइल, आर्किटेक्चरल हार्डवेयर, बाथरूम फिटिङ्स, पाइपहरू, टाइल र सेनेटरी वेयर, पावर औजारहरू, कंक्रीट ब्लक मेसिनरी उत्पादकहरू, मटेरियल ह्यान्डलिंग उपकरणहरू, एल्युमिनियम कम्पोजिट प्यानलहरू आदिको उल्लेखनीय सहभागिता रहनेछ ।

उक्त प्रदर्शनीमा सहयोगी संस्थाको भूमिकामा नेपाल निर्माण व्यवसायी महासंघ, नेपाल चेम्बर अफ कमर्स, नेपाल हेभी इक्विपमेन्ट व्यवसायी महासंघ तथा नेपाल क्रसर तथा खानी उद्योग महासंघ छन् । 

प्रदर्शनीले नेपालमा हाल भइरहेको समग्र निर्माण क्षेत्रको विकास, पुनर्निर्माण तथा आधुनिकीकरणमा टेवा पु¥याउने हामीले विश्वास रहेको निर्देशक सौरभ रजौरियाले बताए । 

उनका अनुसार प्रदर्शनीमा घर बनाउन चाहने व्यक्ति, आम नागरिक बाहेक निर्माण क्षेत्रमा काम गरिरहेका नेपालका दिग्गज आर्कीटेक्ट, इन्जीनीयरस्, कन्ट्रयाक्टरस, विल्डरस तथा इन्टेरियर डिजाइनरहरूको सहभागिता हुनेछ । 

विगतमा झैँ नेपालको निर्माण क्षेत्रमा नयाँ प्रविधिका सामान भित्र्याउने तथा विदेशमा सफलतापूर्वक प्रयोग भएका नयाँ प्रविधिहरूलाई नेपाली बजारमा सजिलै उपलब्ध गराउन एउटा माध्यम बनाउने तथा नेपालमा उपलब्ध सामाग्री तथा प्रविधिहरूलाई बिदेशी संस्थाहरूको सामु देखाउने प्रदर्शनीको मुख्य उद्देश्य भएको आयोजकद्वारा जारी विज्ञप्तिमा उल्लेख छ ।