नयाँ पार्टी खोल्ने तयारीमा जुटे प्रभु साह

मंसिर १५, २०७९ बिहिवार

2.0K

नयाँ पार्टी खोल्ने तयारीमा जुटे प्रभु साह

स्वतन्त्र उम्मेदवारी दिएर रौतहट प्रतिनिधिसभा निर्वाचन क्षेत्रबाट चुनाव जितेका नेता प्रभु साह नयाँ पार्टी खोल्ने तयारीमा जुटेका छन् । एमाले अध्यक्ष केपी शर्मा ओलीले गरेको टिकट वितरणमा असन्तुष्टि जनाउँदै साहले पार्टीबाट विद्रोह गरेर रौतहट ३ मा स्वतन्त्र उम्मेदवारी दिएका थिए ।

यद्यपि प्रभु साहलाई माओवादी केन्द्रसहित सत्ता गठबन्धनले चुनावमा सघाएको थियो । माओवादीबाट उम्मेदवारी दिएका रवीन्द्र पट्टेललाई रौतहट २ मा ब्याक भएर साहलाई समर्थन गर्न माओवादीले निर्देशन दिएको थियो । तर, पट्टेलले उम्मेदवारी फिर्ता लिन नमानेपछि उनी माओवादीको कारबाहीमा परेका थिए ।

यस्तै साहकै समूहबाट रौतहट २ मा स्वतन्त्रबाट उम्मेदवारी दिएका किरणकुमार साह निर्वाचित भएका छन् । निर्वाचित भइसकेपछि साहले कांग्रेस छाडेर स्वतन्त्र उम्मेदवारी दिई सर्लाही ४ बाट निर्वाचित अमरेशकुमार सिंहलाई समेत जोड्न खोजेका छन् । नयाँ पार्टी निर्माणका प्रभुले सिंहसमेतलाई सहभागी गराउन खोजेको उनी निकट एक नेताले बताए । ‘प्रभु जी नयाँ दल खोल्ने अभियानमा जुट्नु भएको छ । कम्युनिस्ट दल खोल्नुहुन्छ कि गैरकम्युनिस्ट भन्न सकिँदैन’ उनी निकट ती नेताले भने, ‘तर उहाँ अब नयाँ दल खोल्नेमा करिब करिब निष्कर्षमा पुग्नु भएको छ ।’ साहले एमालेमा गएका पूर्व माओवादीका असन्तुष्ट नेतालाई समेत जोड्ने भन्दै भेटघाट जारी राखेका छन् ।

प्रकाशित मिति :मंसिर १५ २०७९ बिहिवार - १६:४९:१७ बजे

प्रतिक्रिया