२०८२ माघ १६ गते शुक्रवार
२०८२ माघ १६ गते शुक्रवार
प्रतिनिधि सभा सदस्य निर्वाचनअन्तर्गत समानुपातिकतर्फ जारी मत गणनामा जनमत पार्टीले थ्रेसहोल्ड सीमा पार गरेसँगै राष्ट्रिय दल बन्ने राजनीतिक पार्टीको संख्या ७ पुगेको छ।
प्रत्यक्षतर्फ एक सिट जितेको उसले समानुपातिकको थ्रेसहोल्ड ३ लाख २० हजारभन्दा माथि मत पुर्याएको हो।
यसअघि नेकपा एमाले, नेपाली कांग्रेस, नेकपा माओवादी केन्द्र, राष्ट्रिय स्वतन्त्र पार्टी, राष्ट्रिय प्रजातन्त्र पार्टी र जनता समाजवादी पार्टीले राष्ट्रिय दल बन्ने मापदण्ड पूरा गरिसकेका छन्।
यसैबीच एकीकृत समाजवादी पनि थ्रेसहोल्ड कटाउने कठिन संघर्षमा छ। उसले यो खबर तयार पार्दासम्म समानुपातिक मतको संख्या २ लाख ७१ हजार ५ सय ३८ ल्याएको छ। थ्रेसहोल्ड कटाउन उसलाई अझै ५० हजार मत आवश्यक देखिन्छ।
निर्वाचन आयोगका अनुसार अहिलेसम्म समानुपातिकतर्फ ९७ लाख २२ हजार ९ सय ५२ मत गणना भइसकेको छ।
आयोगका अनुसार कूल खसेको मतको संख्या १ करोड ९ लाख ७० हजार हो भने अहिलेसम्मको आकलनअनुसार ३ लाख मत बदर भएका छन्। यस आधारमा कूल सदर मतको संख्या १ करोड ६ लाख ७० हजार हुन्छ। यो हिसाबले अब समानुपातिकतर्फ गन्न बाँकी मतको संख्या ९ लाख ४७ हजार ४८ हुन्छ।
© 2026 All right reserved to khabarcnter.com | Site By : Sobij
