काठमाडौं । काठमाडौंमा प्रहरीकै संलग्नतामा एक फार्मेसी लुटिएको छ । काठमाडौंको नयाँ बजारमा रहेको समृद्ध फार्मेसीमा लुटपाटमा संलग्न ८ जनालाई प्रहरीले नियन्त्रणमा लिएको छ ।
प्रहरीले दिएको जानकारी अनुसार यही फागुन १२ गते साँझ साढे ७ बजेतिर हामी प्रहरी हौँ, अनुगमनका लागि आएको भन्दै यो समूह फार्मेसीमा छिरेको थियो । उक्त समूहले फार्मेसीका सञ्चालक राजेन्द्र साँकीलाई नियन्त्रणमा लिई काउन्टरमा रहेको नगदसहित अन्य जिन्सी सामान लुटेको थियो ।
यो समूहले सञ्चालकलाई बैंकमा खाताबाट समेत आफ्नो ई–सेवामा रकम पठाउन लगाएको प्रहरीको भनाइ छ । सञ्चालकलाई धम्क्याएर ग्लोबल आइएमई बैंकको खाताबाट १०,०००, कुमारी बैंकको खाताबाट १७०० ई–सेवामा पठाउन लगाएको थियो । जम्मा गरी ६५,००० नगद लुटेको प्रहरीले जानकारी दिएका छन् ।
यसका साथै सञ्चालकको घडी र मोबाइलसमेत लुटिएको थियो । प्रहरीले घटनामा संलग्न प्रहरी जवान सुवास रतोकीसहित ८ जनालाई पक्राउ गरिएको प्रहरीले जनाएको छ । कन्चनपुर सुक्लाफाँटा घर भएका रतोकी सर्वोच्च अदालत सुरक्षा समन्वय इकाईमा कार्यरत थिए ।
अन्य पक्राउ पर्ने अभियुक्तहरुमा जुम्लाका २६ वर्षीय देवी प्रसाद धिताल(२६), धादिङका शंकर रेग्मी(३०), डडेल्धुराका हिक्मत महता(२८) रहेका छन् । त्यसैगरी कञ्चनपुर मिलन बोहरा(३४), पाँचथरका भविन्द्र बेगा(३२), दैलेखका योगेन्द्र बहादुर चन्द(२७), प्युठानका कमल सुनार(२१) लाई पक्राउ गरिएको महानगरीय प्रहरी अपराध महाशाखाले जानकारी दिएको छ ।
उनीहरुको साथबाट ११ थान मोबाइल, घडी, एटीएम कार्ड, चेक लगायतका सामग्री प्रहरीले बरामद गरेको छ ।
