विद्यार्थीहरूका लागि ‘दोस्रो ड्रिम विग च्यालेन्ज–२०२२’ कार्यक्रम आयोजना हुने भएको छ । गैरआवासीय नेपाली संघ अमेरिकाको साइन्स टेक्नोलोजी एण्ड इनोभेसन कमिटीले कार्यक्रम आयोजना गर्न लागेको हो ।

आइतबार शिक्षा पत्रकार समूह र गैरआवासीय नेपाली संघ अमेरिकाले संयुक्त रूपमा आयोजना गरेको पत्रकार सम्मेलनमा उक्त कार्यक्रमको घोषणा गरिएको हो ।

यसमा स्नातक तह अध्ययनरत अमेरिका र नेपाल दुवै देशका विद्यार्थीहरू सहभागी हुन पाउनेछन् । कार्यक्रमका संयोजक एवं साइन्स टेक्नोलोजी एण्ड इनोभेसन कमिटीका अध्यक्ष डा. माधव पाण्डेले नेपाल र अमेरिकामा रहेका विद्यार्थीहरूलाई समूहगत प्रतिस्पर्धा गराइने जानकारी दिए ।

पाण्डेका अनुसार विद्यार्थीहरूमा ‘क्रिटिकल थिङ्किङ’को विकास गर्ने उद्देश्यले यो कार्यक्रम आयोजना गर्न लागिएको हो । प्रतिस्पर्धामा समूहकार्यबाट सिकाइ आदानप्रदान हुने, एकअअर्कामा सांस्कृतिक ज्ञान र अन्तरघुलन हुने, सिकाइ सीप सिक्ने अवसर पाउने अपेक्षा राखिएको उनले बताए ।

प्रतियोगितामा प्रथम हुनेलाई तीन हजार, दोस्रोलाई दुई हजार र तेस्रोलाई एक हजार अमेरिकी डलर प्रदान गर्ने संघका अध्यक्ष बुद्धिसागर सुवेदीले जानकारी दिए ।

यसअघिको च्यालेन्जमा अमेरिकामा विद्यालयतहमा अध्ययनरत विद्यार्थी मात्रै सहभागी गराइएको थियो भने यसपटक स्नातक तहका र नेपालका विद्यार्थीलाई पनि सहभागी गराउन लागिएको हो ।

प्रतिस्पर्धामा एक मिलियन डलर पाएमा त्यसको सही सदुपयोग कसरी गर्न सकिन्छ भनेर विद्यार्थीहरूले आफ्नो योजना र अवधारणा प्रस्तुत गर्नुपर्ने जनाइएको छ । जसमा विद्यार्थीहरू समूहमा बसेर काम गर्ने र समूहमै ‘आइडिया’ प्रस्तुत गर्न सक्नेछन् ।

कसरी दिने आवेदन ?

प्रतिस्पर्धामा सहभागी हुन योग्य विद्यार्थीले आफ्नो नाम, ठेगाना, कलेजको नामसहित dreambig@nrnusa.org मा इमेलमार्फत् आउँदो मार्च २० भित्र आवेदन दिन सक्नेछन् ।

आवेदन दिएपछि दुई सय शब्दमा प्रतिस्पर्धामा सहभागी हुनुको कारण, आफ्नो योजना र आइडियासहितको लेखन दुई हप्ताभित्र पठाउनुपर्नेछ । सोही लेखनका आधारमा आवेदकमध्येबाट १०० विद्यार्थी छनोट गरिनेछ ।

यसरी छानिएका दुवै देशका विद्यार्थीहरूलाई २५ समूहमा राखी प्रतिस्पर्धा गराइनेछ । छानिएका विद्यार्थीलाई विज्ञबाट प्रशिक्षित गराइनेछ ।

अप्रिल ३० भित्र आफ्नो योजनालाई लिखित रूपमा विद्यार्थीहरूले बुझाउनु पर्नेछ । र, मे २८ र २९ मा समूहका प्रत्येक सदस्यलाई जुममार्फत् योजना प्रस्तुत गर्न लगाएर विजेता घोषणा गरिने जनाइएको छ ।