हङकङ । हङकङले आफ्ना सबै नागरिकको अनिवार्य कोरोना परीक्षण गर्ने भएको छ । आगामी दुईदेखि तीन महिनालाई कोभिड १९ महामारी नियन्त्रणका लागि महत्वपूर्ण महिनाका रूपमा लिँदै हङकङले करिब ७३ लाख नागरिकमा कोरोना भाइरस परीक्षण गर्न लागेको हो ।

सबै नागरिकको तीन पटक कोरोना परीक्षण गरिने हङकङ सरकारले मंगलबार जनाएको छ । ग्लोबल टाइम्समा प्रकाशित समाचारअनुसार सरकारले प्रत्येक दिन कम्तिमा १० लाख मानिसको कोरोना परीक्षण गर्नेछ । त्यसका लागि परीक्षण गर्ने केन्द्रहरू थप्न थालिएको जनाइएको छ । यसअघि २०२० मा दुई साताको अवधिमा हङकङले १७ लाख ८० हजार मानिसको कोरोना परीक्षण गरेको थियो ।

यसैगरी कारोना नियन्त्रणका लागि सरकारले भौतिक दुरी कायम गर्ने, क्वारेन्टिनको संख्या थप्नेलगायतका काम आगामी दुई÷तीन महिनासम्म गर्ने समाचारमा उल्लेख छ । पछिल्लो समय हङकङमा कोरोनाको पाँचौँ लहरले अवस्था जटिल बन्दै गएको बताइएको छ । चीनमा प्रत्येक दिन नयाँ कोरोना संक्रमित बढ्दै गएकाले पनि अवस्था जटिलतातिर गएको जनाइएको छ । मंगलबार मात्र ६ हजार २ सय बढीमा कोरोना संक्रमण पुष्टि भएको थियो भने ३६ जनोका ज्यान गएको थियो ।

२०१९ को अन्तिमदेखि फैलिन सुरु भएको कोरोना भाइरसबाट हङकङमा हालसम्म ६६ हजार ५७४ जना संक्रमित भइसकेका छन् । जसमध्ये ३३६ जनाले ज्यान गुमाएको वल्र्डुमिटरमा तथ्यांक रहेको छ । त्यस्तै १३ हजार २३२ जना संक्रमित निको भइसकेका छन् ।