२०८२ भाद्र १४ गते शनिवार
२०८२ भाद्र १४ गते शनिवार
काठमाडौं । राष्ट्रिय सहकारी महासंघले सहकारी विभागसंग तीन दिन भित्र सन्दर्भ ब्याजदर बढाउन माग राखेको छ । महासंघले सहकारी विभाग र सरोकारवाला निकायलाई सन्दर्भ ब्याजदरको सीमा १७ प्रतिशत तोक्न सुझाव दिएको हो ।
महासंघका अध्यक्ष मिनराज कडेल सहितको महासंघको टोलीले हिजो सहकारी विभागका रजिष्ट्रार रुद्रप्रसाद पण्डितलाई भेटेर औपचारिक पत्र बुझाएको छ । सन्दर्भ ब्याजदरका कारण सहकारी संस्थाहरुको सम्पत्ति दायित्व व्यवस्थापन चुनौतीपूर्ण बन्दै गएको भन्दै महासंघले ब्याजदर बढाउन सुझाब दिएको हो ।
बैंक तथा वित्तीय संस्थामा देखा परेको तरलता अभाव तथा बढेको ब्याजदर र सहकारीमा क्यापिङको रुपमा रहेको १४.७५ प्रतिशत सन्दर्भ ब्याजदरले गर्दा सम्पत्ति दायित्व व्यवस्थापन चुनौतीपूर्ण बन्दै गएको महासंघको ठहर छ ।
अन्य बैंक तथा वित्तीय संस्थाहरु सरह सहकारी संघ/संस्थाहरुले बचतमा दिने ब्याजदर वृद्धि गर्नका लागि सहकारीको सन्दर्भ ब्याजदर तत्काल पुनरावलोकन गर्न आवश्यक रहेको महासंघको ठहर छ ।
नेपालको सहकारी अभियानले समेत उक्त आवश्यक ठानेर राष्ट्रिय सहकारी महासंघले सरोकारवाला निकायहरुसँग विभिन्न चरणमा छलफल गरी मंगलबार सहकारी विभागका रजिष्ट्रारलाई ध्यानाकर्षण पत्र बुझाएको छ ।
नेपालको वित्तीय क्षेत्रमा करिब १७ प्रतिशत सहभागिता रहेको सहकारी क्षेत्रको कारोबारमा परेको असरप्रति संवेदनशिल हुन समेत महासंघले विभागलाई आग्रह गरेको छ ।
‘नेपालको सहकारी अभियानको प्रवर्द्धन तथा नियमनमा सहकारी विभागले समय सन्दर्भलाई ध्यानमा राखेर संवेदनशिल भई यो परिस्थितिमा विशेष निर्णय गर्ने विश्वास लिएका छौं,’ जारी विज्ञप्तिमा भनिएको छ, ‘प्रतिस्पर्धि ब्याजदर निर्धारणका लागि तत्काल सन्दर्भ व्याजदर निर्धारण समितिको बैठक बसी सहकारी संघ-संस्थाका आधार ब्याजदरमा बढीमा प्रिमियम ६ प्रतिशतसम्म लिन पाउने गरी अधिकतम ऋणको व्याजदरको सीमा १७ प्रतिशत तोक्नका लागि महासंघले अभियानकोतर्फबाट सुझाव दिइसकेको छ ।’
सहकारी ऐन २०७४ को दफा ५१ बमोजिम गठित सन्दर्भ ब्याजदर निर्धारण समितिद्वारा सहकारी नियमावली २०७५ को नियम २३ बमोजिम २०७६ साउन १९ गते लागू हुने गरी सहकारी संस्थाले सदस्यहरुलाई प्रदान गर्ने ऋणमा १६ प्रतिशत सन्दर्भ ब्याजदर लागू गरेको उल्लेख छ । उक्त ब्याजदरलाई पुनरावलोकन गरी २०७७ कार्तिक १५ गतेबाट लागू हुने गरी १४.७५ प्रतिशत तोकेको स्मरण गराएको छ ।
© 2025 All right reserved to khabarcnter.com | Site By : Sobij
