काठमाण्डौ। कोभिड १९ को संक्रमण तीब्र गतिमा वृद्धि हुन थालेपछि सम्भावित जोखिमको नियन्त्रणका लागि त्रिभुवन विश्वविद्यालयले माघ १० गतेसम्म पढाइ बन्द गर्ने निर्णय गरेको छ । विश्वविद्यालय अन्तर्गतका सम्पूर्ण विभाग र आंगिक क्याम्पसलाई माघ १० गतेसम्म बिदा दिने निर्णय गरेको हो ।
विभाग र आंगिक क्याम्पसले हिउँदे वा वर्षे बिदाबाट कट्टा गर्ने गरी माघ १० गतेसम्म बिदा दिने निर्णय भएको विश्वविद्यालयले जनाएको छ । त्यसैगरी निकटमै परीक्षा हुने भई पठनपाठन अनिवार्य देखिएका कार्यक्रमहरुको कक्षा अनलाइन माध्यमबाट विदाका दिनमा समेत यथावत सञ्चालन गर्न भनिएको छ ।
चलिरहेको परीक्षा भने यथावत् सञ्चालन हुने जनाएको छ । परीक्षा केन्द्रहरुमा संक्रमण नियन्त्रणका लागि पूर्ण सावधानी अपनाउँदै तोकिएको भौतिक दुरी कायम गरी सञ्चालन गर्ने व्यावस्था गर्न आग्रह गरिएको छ ।
स्थानीय निकायसँग समन्वय गरी भौतिक उपस्थितिमा कक्षा लिन सकिने अवस्था भएमा साही अनुसार गर्ने र नसक्ने भएमा अनलाइन माध्यमबाट पठन पाठन गराउन भनिएको छ । यस्तै प्रयोगात्मक कक्षाहरु भने संक्रमण नियन्त्रणका लागि पूर्ण सावधानि अपनाउँदै तोकिएको भौतिक दुरी कायम गरी सञ्चालन गर्न भनिएको छ ।
त्रिभुवन विश्वविद्यालयमा कार्यरत कुनै शिक्षक, कर्मचारीलाई कोरोना भाइरसको सङक्रमण भएमा १० दिन बिदा दिने र सम्बन्धित शाखा ३ दिन बन्द गर्ने निर्णय भएको जनाएको छ ।
