काठमाडौँ । अस्पताल नभएका र जनचेतना कम भएका ठाउँमा बिरामी पर्दा धामी झाँक्रीको भर पर्नु स्वभाविक हो। तर देशको संघीय राजधानी काठमाडौंमा एकसे एक सुविधा सम्पन्न अस्पताल छन्। तर यहीँ बस्ने एक परिवारले अस्पताल भन्दा कथित माताको भर पर्दा आफ्नी १४ वर्षीया छोरी गुमाउनु परेको छ। 

बिरामी बालिकालाई उपचारका लागि भन्दै माताको लगिएको थियो । माता भनिने ती महिलाले बालिकालाई कुटपिटका साथै त्रिशुल रोपेर हत्या गरेको परिवारको आरोप छ। यसरी ज्यान गुमाउनेमा सिन्धुपाल्चोक जिल्ला चौतारा साँगा चोकगढी नगरपालिका–२ घर भई हाल भक्तपुरको बोडे बस्ने १४ वर्षीया रोशनी श्रेष्ठ छिन्। 

उनका आमा, फुपूले एक युट्युब च्यालनसँग गरेको कुराकानी अनुसार रोशनीलाई सामान्य टाउको दुख्ने समस्या थियो। उनी छोपेर बेलाबेला एक्कासी लड्ने गर्थिन् ।  अस्पतालमा लगेर उपचार पनि गरिएको थियो। समस्या कम भएन।

त्यसपछि केहीले रानीवनमा बस्दै आएकी माता भनिने ४८ वर्षीया उमा शाही ठकुरी कहाँ लैजान सुझाव दिएकाले त्यहाँ लगेर राखेको उनकी आमाले बताएकी छिन् । रोशनीलाई त्यहाँ राखेको तीन हप्ता भएको थियो। बालिका बेहोस् भएको भन्दै शनिबार बिहान उमाका सहयोगीले रोशनीकी आमालाई फोन गरेका थिए। परिवार पुगेर उपचारका लागि मोनमोहन मेमोरियल अस्पतालमा लगियो । त्यहाँ लैजाँदा चिकित्सकले करिब ४ घण्टाअघि नै मृत्यु भइसकेको जानकारी दिए। 

परिवारले प्रहरीलाई घटनाबारे जानकारी दिएपछि प्रहरी अस्पतालमा पुगी अनुसन्धान सुरु गरेको थियो। प्रहरीले माता भनिने उमा शाही ठकुरी र उनका दुईजना सहयोगीलाई पक्राउ गरेको छ। माता भनिने महिला र उनका सहयोगीले शुक्रबार साँझ ती रोशनीलाई कुटपिट गरेको छिमेकीले समेत देखको बताएका छन् ।

बिरामी बालिकालाई अस्पताल लैजानु पर्नेमा धामी/झाक्री, झारफुकजस्ता अन्धविश्वासमा पर्दा ज्यान गएको प्रहरीको भनाइ छ। यस्ता घटना हुनबाट जोगिन झारफुक तथा धामी, झाँक्रीको विश्वासमा नपर्न प्रहरीले सचेत गराएका छन्।