दक्षिण कोरियामा कोभिड–१९ को नयाँ भेरियन्ट ओमीक्रोनबाट २ जनाको मृत्यु भएकोछ । कोरियामा ओमीक्रोन भेरियन्टबाट पहिलो मृत्यु भएको कोरियाली समाचार एजेन्सी योन्हापले जानकारी दिएको छ ।
कोरियाको रोग नियन्त्रण तथा रोकथाम एजेन्सी(केडीसीए)लाई उद्धृत गर्दै योन्हापले दिएको खबर अनुसार राजधानी सोलबाट ३३० किलोमिटर दक्षिणमा रहेको ग्वाङ्जु शहरमा उक्त मृत्यु भएको हो । ग्वाङ्जुमा रहेको जेष्ठनागरिक अस्पतालमा उपचारत ओमीक्रोन संक्रमित ९८ वर्षीया वृद्धाको मृत्यु भएको योन्हापले जनाएको छ ।
२६ डिसेम्बरमा कोभिड–१९ पुष्टि भएकी ती वृद्धको भोलिपल्ट मृत्यु भएको थियो । जिन सिक्वीन्सिङ गर्दा ती वृद्धमा ओमीक्रोन भेरियन्ट पुष्टि भएको थियो ।
ओमीक्रोन देखिएकी अर्की वृद्धाको पनि मृत्यु भएको रोग नियन्त्रण तथा रोकथाम एजेन्सीले जानकारी दिएको छ । ९० वर्षीया ती वृद्धामा २५ डिसेम्बरमा कोरोना संक्रमण पुष्टि भएको थियो । उपचारका क्रममा गत बुधबार उनको मृत्यु भएको केडीसीएले जनाएको छ । केडीसीएका अनुसार दुवै वृद्धामा क्यान्सर, मधुमेह, उच्च रक्तचाप लगायतका रोग समेत थियो ।
सोमबारसम्म दक्षिण कोरियामा १३०० भन्दा बढीमा ओमीक्रोन भेरियन्ट फेला परिसकेको केडीसीएले जानकारी दिएको छ । ओमीक्रोन भेरियन्ट देखिएका २१ जना अस्पतालमा भर्ना भएका छन् । यहाँ डिसेम्बर १ मा ओमीक्रोको पहिलो केस फेला परेको थियो ।
