पछिल्लो २४ घण्टामा देशभर कोरोना संक्रमित थपिएका छन्। स्वास्थ्य मन्त्रालयले दिएको विवरण अनुसार २१३ पीसीआर र ६ एन्टिजेन परीक्षणबाट कोरोना संक्रमण पुष्टि भएको हो।
२४ घण्टामा ९ हजार ८७७ जनाको परीक्षण गरिएको स्वास्थ्य मन्त्रालयले जनाएको छ। जसमा पीसीआर परीक्षण ७ हजार १८० र एन्टिजेन परीक्षण ३ हजार ९७ भएको छ। पछिल्लो २४ घण्टामा ३८३ जना कोरोनामुक्त भएका छन् । २४ घण्टामा कोरोनाबाट २ जनाको मृत्यु भएको छ ।
अहिले देशभर सक्रिय संक्रमितको संख्या ४ हजार ९०६ छ । महामारीको दोस्रो लहर सुरु भएयता निकै लामो समपछि सक्रिय संक्रमितको संख्या ५ हजारबाट ओरालो लागेको हो । शुक्रबारसम्म ५ हजार भन्दा माथि रहेकोमा शनिबारबाट ५ हजार भन्दा कममा आएको छ ।
स्वास्थ्य मन्त्रालयका अनुसार अहिलेसम्म पीसीआर विधिबाट गरिएको परीक्षणबाट ८ लाख २७ हजार २७१ जनामा कोरोना संक्रमण पुष्टि भएको छ । एन्टिजेन परीक्षणबाट ९६ हजार १३१ जनामा संक्रमण पुष्टि भएको छ। हालसम्म ८ लाख १० हजार ७८० जना कोरोनामुक्त भएका छन् । कोरोनाबाट मृत्यु हुनेको कुल संख्या ११ हजार ५८५ पुगेको छ ।
२४ घण्टामा ७६ हजार ३३० जनाले खोप लगाएको स्वास्थ्य मन्त्रालयले जानकारी दिएको छ ।
