ओमीक्रोन भेरियन्ट पत्ता लागेको दक्षिण अफ्रिकामा कोरोना संक्रमण मध्ये ९५ प्रतिशतमा ओमीक्रोन भेरियन्ट फेला परेको छ । विश्वका ९० भन्दा धेरै मुलुकमा यो भेरियन्ट फेला परेपनि दक्षिण अफ्रिका बाहेकका देशमा भने संक्रमण वृद्धिको कारण डेल्टा भेरियन्ट नै देखिएको छ।
दक्षिण अफ्रिकामा चिन्ताको विषय यो छ कि, ओमीक्रोन भेरियन्टका कारण अस्पता भर्ना हुने बालबालिकाको संख्यामा वृद्धि भइरहेको छ । दक्षिण अफ्रिकाको नेशनल इन्स्टिच्युट फर कम्युनिकेबल डिडिज(एनआइसीडी)ले दिएको जानकारी अनुसार बच्चाहरु अस्ताल भर्ना हुने दरमा २० प्रतिशत वृद्धि भएको छ ।
सबै उमेरका बच्चामा ओमीक्रोन संक्रमण देखिए पनि ५ वर्ष मुनिका बालबालिका धेरै अस्पताल भर्ना भएको एनआइसीडीले जनाएको छ । दक्षिण अफ्रिकामा मात्रै नभएर ओमीक्रोनका कारण अमेरिकामा पनि बालबालिका धेरै प्रभावित भएका छन् । अमेरिकाको टेक्सास राज्यमा १८ वर्ष मुनिका बालबालिका अस्पताल भर्ना हुनेदर दुईगुणा बढेको अमेरिकी मिडियाले जानकारी दिएका छन् । ओमीक्रोन फैलिएपछि अमेरिकामा ५ वर्ष मुनिका बालबालिका अस्पताल भर्ना हुने दरमा वृद्धि भएको छ ।
ओमीक्रोन देखिएका अस्पताल भर्ना हुने बालबालिकाका अभिभावकले खोप नलगाएको पाइएको चिकित्सकहरुले बताएका छन् । यसअघिको मूल कोभिड–१९ भाइरस र डेल्टासहितका भेरियन्टबाट वृद्ध तथा वयस्कको तुलनामा बालबालिका निकै कम प्रभावित भएका थिए ।
कोरोना संक्रमण अधिक भएका ८२ देशमा भएको मृत्युबाट युनिसेफले निकालेको डाटा अनुसार अहिलेसम्म बालबालिकाको मृत्यु करिब १२ हजार रहेको छ । यो कुल मृत्युमा ०.४ प्रतिशत हो । यो डाटामा २० वर्ष भन्दा कम उमेरका व्यक्तिहरु समावेश थिए ।
यसमा ५८ प्रतिशत मृत्यु १०–१९ उमेरका किशोर–किशोरीको भएको युनिसेफले जनाएको छ । मृत्यु हुनेमा ४२ प्रतिशत १० वर्ष मुनिका बालबालिका थिए ।
अहिलेको ओमीक्रोन भेरियन्टले बालबालिकालाई धेरै प्रभाव पर्नसक्ने आशंका विज्ञहरुले गरेका छन् ।
