२०८२ आश्विन २७ गते सोमवार
२०८२ आश्विन २७ गते सोमवार
काठमाडौँ । नगद नभएपछि बैंक तथा वित्तीय संस्थाले आइतबार मात्र करिब साढे ४९ अर्ब रुपैयाँ राष्ट्र बैंकबाट अल्पकालीन सापटी लिएका छन् । सात दिन परिपक्व अवधि रहेको स्थायी तरलता सुविधा (एसएलएफ) मार्फत ४८ अर्ब १५ करोड रुपैयाँ र एक दिने रिपो मार्फत १ अर्ब ४४ करोड २० लाख गरी कुल ४९ अर्ब ५९ करोड २० लाख रुपैयाँ सापटी लिएको राष्ट्र बैंकले जनाएको छ ।
एसएलएफ र रिपोमार्फत राष्ट्र बैंकबाट सापटी लिने क्रम नयाँ होइन । बैंक तथा वित्तीय प्रणालीमा तरलता संकट बढ्दै गएपछि सापटीको रकम भने उच्च देखिएको छ । यही क्रममा यस आवमा आइतबारसम्म बैंकहरुले १४ खर्ब ७० अर्ब ३८ करोड रुपैयाँ सापटी लिइसकेका छन् । यसमध्ये धेरै रकम भुक्तानी भइसकेको छ । यस्तै, रिपोमार्फत यस आवमा हालसम्म ४८ अर्ब ४९ करोड रुपैयाँ सापटी सुविधा लिएको राष्ट्र बैंकको तथ्यांक छ ।
पछिल्लो समय बैंकहरुमा निक्षेप रकम घटिरहेको छ । नेपाल बैंकर्स एसोसिएसनको तथ्यांकअनुसार पछिल्लो एक सातामा मात्रै १५ अर्ब निक्षेप घटेको छ । कात्तिक १७ देखि २६ गतेसम्म १५ अर्ब निक्षेप घटेको हो ।
कात्तिक १७ गतेसमम वाणिज्य बैंकहरुमा कुल निक्षेप ४२ खर्ब ३८ अर्ब रुपैयाँ थियो भने २६ गतेसम्म आउँदा ४२ खर्ब २३ अर्बमा झरेको छ । कात्तिक लागेदेखि नै बैंकहरुमा निक्षेप घटिरहेको छ । कात्तिकको पहिलो २६ दिनमा कुल ४६ अर्ब निक्षेप घटेको छ । असोज मसान्तसम्म बैंकहरुको निक्षेप ४२ खर्ब ६९ अर्ब थियो ।
© 2025 All right reserved to khabarcnter.com | Site By : Sobij
